SECTIONS
Tuesday, July 16, 2019
SUPERBALITA DAVAO

Kapa founder padayong nag-post sa YouTube

DAVAO. Kapa-Community Ministry International Inc. founder Pastor Joel Apolinario. (Hulagway gikan sa Facebook page sa Kapa)

DAVAO DEL SUR -- Ang YouTube maoy nahimong paagi ni Kapa (Kabus Padatoon) Community Ministry International Inc. founder Pastor Joel Apolinario nga gamiton aron ipaabot niini ang iyang mensahe ngadto sa tanan nilang miyembro.

Unang giangkon niini nga siya mitago tungod kay adunay hulga sa iyang kinabuhi.

Gipangita na sa National Bureau of Investigation (NBI) ang pastor human gikasohan sa gobyerno.

Si Apolinario katapusang nakita sa publiko niadtong Hunyo 13 dihang mitambong sakay sa iyang helikopter sa prayer rally sa liboan ka mga sakop sa Kapa didto sa dakbayan sa General Santos.

Human gimando ni Presidente Rodrigo Duterte nga dakpon sa NBI ug ubang ahensiya sa kapulisan ug kasohan ang mga opisyal sa Kapa, apil ang mga naglihok sa organisasyon, wa na igkita si Apolinario.

Giduso na sab sa Securities and Exchange Commission (SEC) ang kaso ngadto sa buhatan sa Department of Justice (DOJ) sa alegasyong milapas ang Kapa sa Seksyon 8 ug 26 sa SEC Regulation Code dihang nalambigit ang religious group sa giingong investment scam.

Gipamugos sa SEC nga gigamit sa Kapa ang Ponzi scheme, usa ka investment program nga nagtanyag og dakong interes sa salapi sa investors pinaagi sa kontribusyong gihatag sa mga miyembro.

Sumala sa SEC nga kuwalipikado ang Kapa sa fraudulent transaction diin hugtanong gidili sa Seksyon 26 sa SRC.

Gawas kang Apolinario, apil nga gikasohan ang asawa niini nga si Reyna nga maoy corporate secretary ug trustee nga si Margie Danao.

Gireklamo sab sila si Marisol Diaz, Adelfa Fernandico, Moises Mopia, Catherine Evangelista, ug usa ka Rene tungod sa pag-promote sa matud pa investment scam.

Apan, sa Part 3 video nga mensahe ni Apolinario nga naka-post sa YouTube niadtong Dominggo, Hunyo 23, gibatikos niini ang usa ka relihiyon sa Sabadista kon nganong wa giapil og imbestiga sa gobyerno human nagapangikil og salapi ang mga sakop niini.

"Yung relihiyon na yan ay nanloloko sa kapwa tao. Yung mga members nila palaging hiningian dahil hindi ka maliligtas kung hindi ka magbibigay ng ikapu (ikasampo). Kung tutuusin yung ikapu naman yung sinasabi naman ng Corinthians 9:7 sinabi God loves a cheerful giver, eh hindi naman ikapu yung sinasabi doon," asoy ni Apolinario.

Gihagit sab niini ang Bureau of Internal Revenue, Department and Industry, ug SEC nga apilon pag-imbestiga ang maong relihiyon sanglit wa siya magbinuang sa iyang mga sakop.

Gitataw ni Apolinario nga ang maong grupo sa Sabadista mao sab ang nagsulsol kang Jesus is Lord Ministry founder Pastor Apollo Quiboloy aron ipaabot kang Presidente Rodrigo Duterte nga pasirad-an ang Kapa sanglit wa gipaminaw sa SEC ang una nilang sumbong.

Hugtanong gilimod ni Apolinario nga usa ka pyramiding scheme ang iyang gihimo mao nga himuon niini ang tanang lakang aron paminawon sila sa gobyerno.

Gidason sa founder nga nagpatabang na sila sa International Tribal Court ug huwaton na lamang sa Hulyo 1 o 2 nga mahitabo ang tabang kanila sa customary law sanglit usa siya ka sakop sa Lumad ug siya mao si "Datu Mamahandi." (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph