DEAR Noy Kulas,
Tagoa lang ko sa ngan Banj, 35 years old. Ang akong ipa tambag nimo, Noy Kulas, ang kabahin sa akong kaugalingon. Naglibog ko kon unsay akong gusto sa relasyon.
Ang akong live-in partner karon ikatulo na nako ni nga partner. Wa ko mosugot nga makigminyo although willing silang tanan nga mopakasal nako kay feel nako, di pa sila ang right guy. Sa sugod, nindot pa kaayo ang akong ma-feel sa among relationship, apan magkadugay laayon na hinuon ko dayon makigbuwag ko nila.
Kaning ikatulo nako nga live in partner ganahan na kaayo nga magpakasal mi kay he has a very stable business ug gusto na ang iyang parents nga makakita sa liwat. Apan wa ko mosugot kay bisan giunsa namo, wa gihapon ko manganak. Wa ko magpa check up sa doktor aron mahibaw-an ngano wa pa ko momabdos. Karon, nakulbaan na ko kay maorag ganahan na sab kong mobiya sa relationship nako karon. Please tambagi ko unsay akong buhaton. Pasabta ko kon ngano ingon ani ko.
BANJ
Banj,
Duna gyuy mga tawo nga sama nimo, pul-anon og relasyon. Kana bang sa sugod, ingon sa nagdilaab sa kayo, apan magkadugay magkapawong. Kadaghanan niini mga lalake.
Usa sa maayo nimong buhaton mao ang paghuna-huna kon unsa man ang imong tumong sa pagpakigrelasyon? Unsay imong gipangita sa usa ka lalake ug unsa may imong gustong mahitabo sa relasyon? Ayaw usab ambak og relasyon human ka makigbuwag sa usa. Hayan mao ni ang nahitabo nimo. Human sa pakigpuyo sa imong partner ug di ka na ganahan, mobiya ka ug mosulod ka na usab sa laing relasyon nga live-in gihapon. Nganong di ka man makigrelasyon nga di mo magpuyo aron di usab magdahom ang lalake nga kasal na ang inyong padulngan. Samtang uyab pa mo, mag-ila-ila mog maayo sa lalake. Until imong makita if he is the real deal, angay pamanhon.
Ikaduha, pahiling sa doktor kon makaanak ka ba o di? Basin ang imong gipangita anak mao nga you jump from one relationship to another. Kini ra bang makabaton ka og anak mousab sa dagan sa imong kinabuhi, labina sa imong panghuna-huna. Mas inspired ka kay duna ka nay anak. Pagpa check up aron masusi ang imong kahimtang.
Ayaw pagdali og relasyon kay basin moabot ang panahon, kon ikaw na sab ang mahigugma og maayo, ikaw na sab ang biyaan.
NOY KULAS