MOLUGNOT si Kawhi Leonard sa katapusang tuig sa iyang kontrata sa Toronto Raptors nga nagbalor og $21.3 million aron mahimong free agent apan seryusong gikonsiderar niini nga magpabilin sa bag-ong kampiyon sa National Basketball Association (NBA).
Si Leonard, kinsa maoy Finals MVP, gilauman nang daan nga molugnot sa katapusang tuig sa iyang lima ka mga tuig nga kontratang gipirmahan sa San Antonio Spurs, nga nag-trade kaniya sa Raptors niadtong summer.
Karong Hunyo 29, nga naatol sa adlaw’ng natawhan ni Leonard, maoy katapusang adlaw aron opisyal siyang nga makalugnot sa iyang kontrata sa Spurs nga nasawo sa Raptors.
Si Leonard, kinsa lumad nga taga Los Angeles, gikatahong interesado nga mobalhin sa Los Angeles Clippers ug New York Knicks nga pulos gilaumang mohimo og dakong lakang aron makuha nila ang labing gihisgutang magduduwa sa kasamtangan.
Dili ikalimod nga makadani ang puwedeng itanyag sa Clippers ug Knicks ngadto kang Leonard apan gumikan sa nabugkos nga relasyon tali ni Leonard ug sa Raptors human nila napusgay ang gingharian sa Golden State Warriors dili sayon hubaron.
Ang Raptors maoy bugtong team nga makatanyag kang Leonard sa maximum deal nga lima ka mga tuig nga kontrata nga nagbalor og $190 million, labaw og $15 million sa labing taas nga matanyag sa ubang teams.
Mahimo sab nga mohangyo si Leonard sa Raptors og mas mubo nga kontrata apan magdawat gihapon siya sa labing dakong suweldo sa usa ka magduduwa sama sa gibuhat ni Los Angeles Lakers superstar LeBron James. (Reuters, ESL)