LIMA ka basketball teams gikan sa Luzon, Visayas ug Mindanao ang magtigi sa usa ka dakong torneyo sa Bayugan City nga giulohan og Mayor’s Cup Invitational Basketball Tournament.
Ang torneyo, nga nagdalit og dul-an sa P600,000 nga kinatibuk-ang ganti, ipahigayon karong Hunyo 26-29 sa Lope Asis Memorial Gymnasium sa Poblacion, Baguyan City.
Tipik kini sa kasaulogan sa 12th Charter Day ug Bayug Festival sa Bayugan.
Lakip sa mosalmot sa torneyo mao ang duha ka teams sa Cebu Schools Athletic Foundation Inc. (CESAFI) nga mao ang Mair Construction/University of Cebu (UC) Webmasters ug Vincare Pharma/Phinma Southwestern University (SWU) Cobras alang sa rehiyon Visayas.
Naa sab ang team sa UAAP nga mao ang ARQ-Builders/Far Eastern University (FEU) Cobras nga magrepresentar sa Luzon ug Madyaw Construction/Valenzuela Classics nga magrepresentar sa Luzon.
Mokompleto sa mga partisipante mao ang HMMED Enterprise/Cagayan de Oro nga magrepresentar sa Mindanao.
Naglagiting nga P200,000 ang maangkon sa kampiyon sa torneyo, ang 2nd placer adunay P150,000, makaluklok og P100,000 ang 3rd placer, P75,000 sa 4th placer samtang P50,000 sa 5th placer.
Ang torneyo mosubay sa single-round robin diin ang mopatigbabaw nga duha mao ang magsangka sa championship game samtang ang magsunod nga duha mag-ilog sa ikatulong luna.
Ang torneyo, nga gisuportahan sa Bayugan local government pinangulohan ni Mayor Kim Lope A. Asis, nahimong posible sa paningkamot ni tournament organizer Van Halen Parmis. (ESL)