SA IKATULONG higayon, moaway na usab alang sa world title ang Filipino fighter nga si Arthur Villanueva.
Ning higayona, ikasangka ni Villanueva sa Ala Boxing Gym si World Boxing Council (WBC) bantamweight champion Nordine Oubaali karong Hulyo 6 sa Barys Arena sa Astana, Kazakhstan.
Gipadayag ni Villanueva nga 50-50 ang iyang tsansa sa maong away. Matod niya nga way pressure kaniya nga mo-knockout ni Ouabaali apan kini kabahin na usab sa ilang game plan. Alang kaniya nga ang kadaugan maoy anaa sa iyang alimpatakan, ma-knockout man o ipaagi sa desisyon.
Ang 30 anyos nga Villanueva adunay 32-3-1 nga record diin 18 niini iyang gipang-knockouts.
Katapusang misuway si Villanueva sa paglangkat sa titulo niadtong Abril 22 didto sa London diin gipildi siya pinaagi sa unanimous decision batok sa South African nga si Zolani Toto alang sa World Boxing Organization (WBO) bantamweight title.
Sa iyang unang world title fight, iyang gika-engkuwentro si McJoe Arroyo alang sa bakanting International Boxing Federation (IBF) title niadtong Hulyo 18, 2015. Sa maong away napildi siya pinaagi sa technical decision didto sa El Paso, Texas.
Si Oubaali, 32 anyos, wa pay pildi sa 15 ka away, 11 niini ang gipaundang. Niadto lang Enero 19 sa Las Vegas iyang gipildi si Rau’shee Warren alang sa bakanting WBC belt.
Matod ni Villanueva, taga Bago City, Negros Occidental nga posibling kini maoy iyang katapusang hunat nga makaangkon og world title. (JBM)