LABAD. Ang problema sa trapiko sa dakbayan sa Lapu-Lapu susama ra usab sa dakbayan sa Mandaue ug sa Cebu. Mao ni usa sa mga labad sa ulo nga atubangon unya ni Kap. Ahong Chan, ang bag-o nga haun nga mayor sa Lapu-Lapu nga mosugod og lingkod sa Dominggo, Hunyo 30.
Daghan na ang solusyon nga gipahimutang ug gipatuman sa panahon ni Mayor Paz Radaza ingon man sa iyang bana, kanhi mayor Boy, nga iyang gisundan nga mayor, aron sa pagsulbad sa grabe nga trapiko apan hangtud karon anaa gihapon ang maong problema labina sa dapit nga dunay mga malls o establisamento.
Ang dalan padung sa Marigondon, nga naa didto ang kadaghanan sa mga beach resort, nga gipahinungod sa ngan ni kanhi mayor Max Patalinghug, maoy usa sa mga dalan nga pirmi nga puno sa mga sakyanan.
Ang grabe ig-abot sa usa ka interseksyon sa Basak diin dunay usa ka dakong mall nga nahimutang sa eskina. Tungod kay mabara ang mga sakyanan inig hunong sa mga traysikol nga mopasakay o mopakanaug sa pasahero.
Gani, bisan og gibutangan na og koral nga puthaw ang tunga sa dalan atubangan sa mall aron di magpatuyang ug liko ang mga traysikol ug uban pa nga sakyanan apan grabe gihapon ang trapiko. Niadtong Dominggo nga padung mi sa Marigondon ang linya sa mga sakyanan miabot na duol sa usa ka hospital.
Si Mayor Chan nagkinahanglan og traffic czar nga adunay hataas og pailob aron paghatag og kasulbaran aning nga problema sa. Usa sa mga hinungdan niini mao ang nagkadaghan nga mga sakyanan nga pribado, jeep depasaheroan ug traysikol, nga ang kadaghanan sa mga drayber di motuman sa lagda sa trapiko.
Moingon ang mga eksperto sa ekonomiya nga ang pagdaghan sa sakyanan usa sa mga barometro nga nagpasabut nga maayo ang dagan sa negosyo nga maoy usa sa makapalambo sa ekonomiya. Tungod sa kadaghan sa sakyanan, kadaghanan ani nila anha na moparking sa kilid sa dalan tungod kay ang tag-iya way kabutangan.
Kanang “illegal parking” sa mga sa sakyanan sa kadalanan mao usab kini ang nakadugang sa problema kay imbis nga halapad ang dalan mogamay na hinuon.
Lain nga hinungdan nganong daghan gihapon ang way disiplina nga mga drayber kini tungod nga sayon ra kaayo nga kuhaon og balik ang lisenya nga nadakpan. Sa mubo nga estorya tungod ni sa korapsyon. Mao usab ni lilion og maayo ni Mayor Chan.
Ang korapsyon anha magsugod sa dakop. Daghan ko og nadawat nga taho nga sikopon sa traffic enforcer ang sakyanan bisan walay sayup basta ilang makita nga ang drayber langyaw, labina kon Koreano.