INTACT o kompleto pa kuno gihapon ang Bando Osmena Pundok Kauswagan (BOPK) sa gihimong loyalty check. Kini matod pa ni Konsihal Sisinio Andales, kinsa sakop sa BOPK.
Matod ni Andales, mi-commit gihapon ang tanang mga sakop sa BOPK nga magbilin sa ilang grupo lakip ni Konsehal Dave Tumulak ug Jerry Guardo, kinsa una nang mipadayag sa ilang pagsuporta sa administrasyon ni Mayor Edgardo Labella.
Si Guardo bisan tuod og napilde niadtong miaging eleksiyon apan posible kining makalingkod pag-usab sa konseho kon ma-disqualify si Alvin Arcilla.
Nidesisyon na ang Commission on Elections (Comelec) en banc nga i-disqualify si Arcilla kay dili na kuwalipikado nga magpapili pag-usab. Pakyas si Arcilla sa pagkuha og temporary restraining order sa Supreme Court si Arcilla busa dili gyud siya makalingkod. Mosunod usab ang kaso ni Andales. Kon ma-disqualify si Andales si Joel Garganera ang mohulip kaniya. Nganong naka-ingon man si Andales nga intact gihapon ang BOPK?
Kay mipadayag naman sila si Guardo ug Tamulak sa ilang suporta kang Labella, sigurado kini nga mobalhin na sila sa Barug. Ang BOPK mahimo na kining Bando Osmena Pundok Kabungkagon na.
Samtang dili pa makalingkod sila si Guardo ug Garganera, majority pa gihapon ang taga BOPK. Mao man gani nga mibahad ang taga BOPK nga inig inaugural session ug re-organize sa konsdho inig lingkod ni Labella dili nila hatagan og chairmanships ang taga Barug. Pero kon mo-majority na usab ang Barug sigurado nga ma-usab na pod ang kamada diha sa konseho.
Kay majority naman unya ang taga Barug, sigurado nga maglawig nga walay babag o sami ang mga program sa administrasyon ni Labella. Gawas lang kon mohimo og mga “milagro” si Vice Mayor Mike Rama. Sayod naman ta nga naa gihapoy sa ambisyon ni Mike nga mobalik sa pagka-mayor.
Basin alkontrahon niya ang mga programa ni Labella kay siya na ang gustong mag-mayor sa sunod nga eleksiyon. Nagkagubot naman gani ron nga wala pa gani sila opisyal nga nakalingkod. (bobbygnalzaro@gmail.com)