TULO ang nakabsan sa kinabuhi sa aksidente nga natigayon sa Sitio Quipasa, Barangay Poblacion, lungsod sa Mambajao, Camiguin.
Ang Mambajao Police Station sa pagpanguna ni Police Captain Arnold Gaabucayan niila sa mga namatay nga mao sila si Jovert de Asis, Ian Jumahalili ug Julie Ann Mae Olive kinsa pulos mga trabahante sa call center sa IBEX Company sa Davao City ug nahidangat lamang sa sa probinsya alang sa ilang team building.
Moabot ngadto sa 14 ang sakay sa pasahero sa Toyota Hi-Ace van nagdala sa plaka PN-PYQ 248 nga gimaneho ni Joy S. Sobremisana, lumad nga taga-Sultan Kudarat kinsa nakaangkon gihapon og samad.
Ang mga pasahero nga anaa sa kritikal ang kondisyon giilang sila Eric Opao, 38; Jeffry Golingay, 33; Ernesto Ong, 24; ug Rose ann Balaba.
Samtang pabiling giobserbahan sa mga doktor ug anaa na luwas sa kahimtang sila si Jeffry Dismas ug Peter Anthony Cantila, 26, pulos gihapon trabahante sa IBEX.
Ilang mga kauban nga sila Glyn Ann Sabacan, 34; Jenny Vic Morensillo, 21; Rustom Porosuelo, 29; ug 4 anyos nga si Miko Golingay.
Adlawng Sabado nahidangat sa probinsya ang mga biktima ug tungod sa kagamay na lamang sa oras nga moadto sa White Island, giuna nila ang pagsaka sa cold spring sa Barangay Poblacion.
Apan sa ilang pagtugbong, nawad-an og brake ang sakyanan ug bisan unsaon sa driver og pugong, milahos kini ug sa kusog nga impak, mibangga kini deretso sa punoan sa lubi.
Duha ang dead on spot, samtang usa kanila dead on arrival sa balay tambalanan.
Ang mga biktima ang naa pa karon gipangdala sa Mambajao District Hospital ug giobserbahan.
Ang kagamhanang lokal sa lungsod niatiman na usab kanila ug tagsa-tagsa na nga gipahibalo ang mga pamilya sa mga biktima.