GUSTO karon ni Police Regional Office (PRO) 7 Director Debold Sinas nga kadtong mga pulis sa Bohol kinsa nga mga sakop sa Kapa-Community Ministry International Inc. mokiha sa mga kadagkuan sa maong religious group.
Kay kon dili hayan sila ang mopasaka og administrative case batok sa mga pulis kinsa ila usab nga gikonsiderar nga mga biktima sa Kapa.
“That is what we would like them to do, to file a formal complaint against Kapa as they are considered victims also. If not, we will be the ones to file (an) administrative case against them. That is why I told our investigators to conduct dialogues with them. Then later on, we will convince them to file a case,” matod ni Sinas sa interview sa SunStar Cebu.
Si Sinas mipahimangno ngadto sa ilang mga sakop nga relibohan ug kuhaan og armas kadtong mga police personnel nga mo-invest sa Kapa.
Ato man tuod nga gihangop kining pagprotehir ni Sinas sa iyang mga sakop, pero ang wala nato masabti kon nganong iya man kining pasakaan og mga kasong administratiba kon dili mokiha sa Kapa?
Unsa may ilang sala? Nakaapektar ba kini sa ilang trabaho?
Wa ba diay mobati og simpatiya si Sinas sa iyang mga tawo nga nabiktima usab sa maong pundok?
Hangtod karon wala pa gihapoy bisag usa nga sakop niini nga niunay o nangahas sa pagpasaka og kaso.
Ambot og unsay igong kapasikaran ni Sinas sa kasong administratiba batok sa mga pulis nga iya man gyung pugson.
Nganong di man itugyan ni Sinas ngadto sa iyang mga sakop ang paghukom kon mopasaka ba sila og kaso o dili batok sa Kapa kay ila na man kining katungod?
Mora na man hinuon og iyang gipa-on ang iyang mga tawo.