GIHATOD sa personahe sa Kapitolyo Probinsyal ang mga naimbentaryo na nga mga gamit nga gipanag-iyahan sa mga bakwit human gipapahawa sa Capitol Park dihang nakasupak sa pagtukod og balay sa dapit.
Adlawng Martes niaging semana gipapahawa ang mga bakwit diha sa Capitol Park human nagtukod og mga estruktura sa ilang balay nga adunay kasupakan sa Office of the Building official.
Tanan nilang mga butang gihakot sa mga personahe sa Kapitolyo Probinsyal ug gisakay sa dump truck kay dalahon unta kini pauli didto sa lungsod sa Lagonglong Misamis Oriental.
Apan ang mga bakwit nga nidumili sa pag-uli sa ilang lugar sa Lagonglong ang milahos sa usa ka balay alampoanan sa Brgy Macasandig ug didto nagpasilong.
Niadtong adlawng Sabado, mga gamit lakip ang mokabat 47 ka sako sa NFA rice ang gihatod sa dump truck nga gipanag-iyahan sa Kapitolyo.
Apan si Datu Reynaldo Ayuma sa lumad nga Tagbalunon nidumili sa pagpirma nga ilang nadawat ang mga gamit.
Pipila sa mga bakwit nagreklamo ug nagyawyaw. Aduna sab kanila naglasong ug gipanglabay ang ilang mga butang. Adunay gipangsipa ang sudlanan sa bugas, hinungdan nagkatibuyaag ang sulod niini ug gikasuko kay nangatipak ang ilang mga balde, planggana, nawala ang taklob sa rice cooker lakip ang ilang heater naguba.
Usa sab ka sakop sa bakwit mireklamo kay ang iyang kwarta nga adunay P2,000 nga anaa sulod sa iyang bag wala na sa gibutangan ug nawala.
"Iuli na ninyo pero mga tipak ug mga guba na!" kini ang sagaad nga mabati nga reklamo sa mga bakwit.
"Dili gyod mi mopirma ana kay sayon rana nila pulihan nga nauli nila tanan gamit pero daghan diay to guba ug nangawala," matud sa pipila.
Ila sab giingon sa SunStar Superbalita Cagayan de Oro nga dili maayo ilang kahimtang didto sa Macasandig ug bisan gani sa Capitol Park tungod kay mahapsay lamang ang ilang pamuyo kon makabalik sila mismo didto sa ilang lugar sa Sitio Mikamansi, Barangay Banglay, lungsod sa Lagonglong.
Ang personahe gikan sa Provincial Social Welfare Development nidumili sa paghatag og pahayag human wala gipirmahan ang ilang gidaladala nga unta pagdawat lamang nagpamatoud nga gibalik na ang mga gamit sa bakwit.
Dili sab kini makasulti kung kadtong giakusar sa mga bakwit nga nawala nga kwarta lakip butang ug pagkaguba sa ilang mga gamit ang ila ba nga pulian karong panahona.