GIKABALAKA sa katawhan sa siyudad sa Cagayan de Oro ang taho nga wala nay pundo ang Department of Public Works and Highways (DPWH) sa mga kasamtangang proyekto sa siyudad sa Cagayan de Oro.
Kini human nakigtagbo ang mga sektor sa mga negosyante sa siyudad uban sa DPWH tungod sa sunod-sunod nga pagbaha niadtong niaging semana diin apektado na ang mga negosyante.
Si Konsehal George Goking, tsirman sa Komitiba sa Trade and Commerce sa konseho sa siyudad, nisaway sa DPWH ug niingon nga morag kini sila og naghimo og fishpond sa siyudad tungod kay bisan gamay nga ulan, mobaha na dayon ang pipila ka mga dapit.
“DPWH is in the business of fishpond, kay gipangtubig, gibahaan. Don’t you know that mga student sa USTP, ang business sector are complaining so unsa man ang inyong solution?” pahayag ni Goking.
“It is no joke. It is not funny. I am made to believe that you are in fishpond business. Murag naghimo naman mo og swimming pool. Mas maayo siguro mangunsolta mo sa Ayala kay walay baha sa Ayala. Kung nainsulto mo, I am sorry but I was very descent," dugang niini.
Nangayo usab si Goking og opisyal nga pahayag gikan sa DPWH nga wala kini insaktong pundo alang sa mga proyekto.
Duna'y aksiyon usab ang sektor sa mga negosyante aron nga matabangan sa pagsulbad sa nasinatiang problema sa siyudad.
Samtang pipila ka mga residente sa Barangay 22 ang nabalaka niini tungod kay labing apektado sila sa wala pa matibawas nga proyekto sa dalan sa Gaabucayan.
"Ilang gipangsirad-an ang kanal. Karon, panahon nga mag-ulan, baha deretso bisan hinay ra nga ulan kay wala na may maagian ang tubig sa kanal," komento sa usa ka residente.