SIKOP ang 24 ka mga indibidwal atol sa gipahigayong "Oplan Galugad" sa tinugyanan sa Cagayan de Oro Police Office (Cocpo) niadtong Hunyo 22, mga alas 3:00 sa kaadlawon, sa Tangkungan, Pinikitan, Barangay Camaman-an, siyudad sa Cagayan de Oro.
Ang 17 ka mga indibidwal nalambigit sa ilegal nga druga, physical injury, pagpangawat, dunay warrant, pagdala og mahait nga butang ug pagpanulis, samtang gi-rescue ang pito ka mga menor de edad kinsa nakasupak sa ordinansa sa siyudad ug ang pipila niini gigamit nga mga runner sa ilegal nga druga.
Lakip sa nasikop mao ang mga "high-valued personalities" nga sila si Jalal Ibra, kinsa target sa Cocpo, kinsa nalambigit sa lapad nga area sa pagpakatap og ilegal nga druga kinsa nakuhaan og kapin kon kulang napulo ka gramo sa shabu ug gani naaresto na kaniadto kinsa nakuhaan og 50 ka gramo sa shabu apan nakagawas tungod sa plea bargaining.
Sa nahipos nga impormasiyon gikan sa Cocpo, giingong kini tungod sa sunod-sunod nga krimen o mga insidente ang naobserbahan nga nahitabo diha sa maong dapit.
Ang Oplan Galugad direktiba ni Police Brigadier General Rafael Santiago Jr., director sa Police Regional Office-Northern Mindanao, inabagan sa bag-ong naorganisa nga Regional Special Operation Group ug sa kapulisan sa siyudad sa Cagayan de Oro.
Gipahigayon kini ilabi na sa bag-o lang nga nahitabong mga insidente sa maong dapit sama sa pagpangdunggab, carnnaping ug uban pa nga mga krimen.