ANG Center for Healthcare Professions (CHP) Cebu Inc., nag-una nga training and assessment center sa Technical Education and Skills Development Authority (Tesda), niabli sa extension campus sa Main Building III . VG Arcade IT Park, Barangay Subangdaku, dakbayan sa Mandaue.
Ang pag-abli sa CHP Cebu Inc. Mandaue extension campus dakong kalamboan sulod sa 17 ka tuig sa pagkatukod sa center. Dili lang kini accredited sa Tesda apan gitugotan sa Department of Education (DepEd) nga makatanyag sa junior ug senior high hinungdan nga niabli og extension campus tungod sa nagkadako nga gidaghanon sa ilang mga tinun-an.
Ang CHP Cebu Inc. main branch nahimotang sa Mezzanine Floor, FCB Financial Center, AC Cortes Ave. eskina P. Burgos St., Barangay Alang-Alang sa samang dakbayan.
Ang ilang klase sa senior ug junior high nagsugod niadtong Lunes, Hunyo 24, human gisubhan ang maong extension campus niaanng Biyernes sa buntag, Hunyo 21.
Si Bernard Restificar, presidente ug CEO sa CHP, maoy nangulo sa seremonyas sa ribbon cutting ug giabagan nila ni Dr. Francisca Opog, Tesda provincial director; Dr. Rogelio Garbo, South District Supervisor, Mandaue; Dr. Joseph Abing, Medical Officer sa Lapu-Lapu City Division; ug ubang mga bisita.
Ang enrolment sa senior ug junior high uban sa ilang tanyag nga 50 percent discount sa matrikula nagpadayon hangtod sa Hulyo 15.
Samtang, ang ubang kurso o qualifications nga acredited sa Tesda magpadayon sa tibuok tuig sa main ug extension campus.
Alang sa dugang kasayoran bahin sa gitanyag sa CHP Cebu, Inc. ug CHP Cebu Inc. Mandaue City extension campus, mahimong mobisita sa ilang buhatan sa nahisgotang addresses sa taas. (RRM)