Nakigsabot alang sa Johndorf Tower

PORMAL nga nakigbahin ang Johndorf Ventures Corp. (JVC) sa mga kakumbaya niini aron masugdan na ang pagtukod sa 21-andanas nga Johndorf Tower atbang sa Ayala Center Cebu sa Cebu Business Park.

Gitiman-an ni Richard D. Lim, pangulo ug CEO sa JVC, ang kontrata ni’ng bag-o pa lang uban sa mga nangulo sa upat ka mga kompanya nga nag-una sa ilang masigka-industriya ug propesyon.

Gikasabot ni Lim sila si Jose Siao Ling sa Jose Siao Ling & Associates (JSLA) alang sa architectural designs ug Manuel Mendoza, pangulo ug CEO sa Monocrete Construction Philippines, Inc. (MCPI), isip general contractor.

Gidisenyo nga mapamatud-an nga nagtamod sa GOLD LEED (Leadership in Energy and Environmental Design) ang maong edepisyo, gitahasan sa JVC si Dean Barone sa Barone International isip LEED consultant.

Nakig-alayaon sab ang JVC kang David Leechiu sa Leechiu Property Consultants, Inc. (LPC) isip mailinong ahente sa pagpa-upa sa mga opisina ug mga espasyo alang sa pagpamatigayon.

Matod sa JVC CEO, “The synergy of JOHNDORF ug sa kakumbaya niini sa pag-ugmad niining proyekto mo-usab sa industriya sa pagpanukod dinhi sa Sugbo kabahin sa pagka-malahutayon ug pakig-alayon.”

Gibungkal sa JVC ang P1.6 bilyones nga Johndorf Tower pagka-Peb. 21, 2019 sa nahimutagan niini tapad sa Ayala Life FGU Center nga gitung-an sa Mindanao Ave. ug Biliran Loop.

Gikatakdang mahuman sa duha ug tunga ka tuig, aduna unya’y 18-mil nga metro kwadrado nga kaabangan ang Johndorf Tower uban sa 300 nga kaparadahan, mga tindahan sa ubos nga bahin, ug mga kan-anang al fresco, matod ni Ed Byron Monares, ang project development manager.

Sa kapin na sa 30 ka tuig, JVC nag-ugmad og mga proyektong kapuy-anan, ma edepisyo man o’ mga subdivision, sa Kabisay-an ug Mindanao. (PR)