CTMS adunay mga bag-ong motorsiklo

ADUNAY walo ka mga bag-ong motorsiklo ang mapahimuslan na unya sa City Traffic Management System (CTMS) sa dakbayan sa Lapu-Lapu nga magamit sa pagresponde sa mga insidente may labot sa trapiko sa dakbayan.

Ang maong mga motorsiklo nga Yamaha XT model nga adunay kinatibuk-ang kantidad nga P1.2 milyones nga nangabot niadtong miaging semana.

Gikatakda kining gamiton sa mga traffic inspector sa dakbayan atol sa ilang pagroving sa kadalanan sa Lapu-Lapu.

Gibutyag ni Mario Napule ang pangulo sa CTMS nga sukad sa iyang paglingkod isip Officer-in-Charge sa CTMS iyang nabantayan nga wala gayuy mga motor nga magamit ang iyang mga inspector.

Personal nga motorsiklo matod pa ang gipanggamit niini sa ilang pag-roving sa dakbayan.

Gumikan kay personal nga motorsiklo man ang ilang gigamit, personal nga kwarta usab ang gigamit sa iyang mga inspector sa pagpa-gasolina sa ilang pag-roving sa dakbayan.

Karon nga aduna nay motorsiklong gitagana alang kanila hayan matagaan na usab kini ug budget sa dakbayan nga pang-gasolina alang sa ilang opisyal nga paggamit.

Mapasalamaton si Napule sa kagamhanan sa dakbayan sa Lapu-Lapu nga gihatag ang ilang dugay na nga hangyo sanglit mapahimuslan man gihapon kini bisag kinsa pa ang mosunod nga molangkob nga mga personnel sa CTMS.

“Makatabang gyud ni kay dako baya ang Lapu-Lapu gibahin nato ni ug tulo ka sector, unya every sector naa tay usa nga active nga mag roving,” pasabot ni Napule. (GCM)