NANAWAGAN ang kagamhanan sa dakbayan sa Mandaue ngadto sa dakbayan sa Sugbo nga pahugtan sa pagpatuman ang three-meter easement sa mga illegal structures daplin sa mga sapa ingon man ang pagpatuman sa solid waste management.
Namatikdan nga usa kini sa hinungdan nga pabiling daghang basura diha sa Mahiga Creek resulta nga mi-awas atol sa pagbunok sa unwa niadtong Domingo, Hunyo 23, habig sa Mandaue.
Bisan hangtud kagahapon, Hunyo 24 sa dihang gisusi ning tigbalita ang maong sapa atbang sa Innodata sa may dan Lopez Jaena, nalukop sa basura ang dapit bisan nga nihubas ang tubig.
Nimando si Mandaue City Vice Mayor Carlo Fortuna sa Department of Public Services nga motabang sa paghakot sa mga basura.
Samtang ang barangay Subangdaku ang nihimo sa pagpanglimpyo sa dalan gumikan sa pagpasad sa ga basura gikan sa niawas sa sapa.
Nipahinumdum ang maong opisyal ngadto sa kagamhanan sa siyudad sa Sugbo nga susihon pagbalik ang mga establisemento nga anaa sa sapa ug mo-estrikto sa pagpatuman sa three-meter easement.
“Kini gud sa atong side (Mandaue) ato naman ni gi-clear ang mga informal settlers.
“We believe that the source of that flood, the source of that garbage could be coming from Cebu City kay ang outfall gud sa Mahiga is shared by Mandaue ug Cebu City,” tipik sa panawagan ni Fortuna.
Iyang gipahibawo nga adunay nay kasabutan ang matag City Environment and Natural Resources Office (CENRO) ug DPS sa duha ka kagamhanan, ilabi na ang pag-monitor ug pahimo og aksyon kalabot sa mga ipanglabay nga basura dili lang sa sapa, apan lakip na sa mga culvert.
Samtang ang kapulisan sa dakbayan sa Mandaue City Police Office ang niandam na usab sa ilang mga responding personnel ug nihimo sa pag-imbentaryo sa mga kahimanan alang sa dinaliang pagresponde kon ugaling gikinahanglan ilabi na ang pagpunay og uwan.
Ilabi na sa mga sitwasyon nga adunay mga pagbaha, dili kapugngan ang pagdahili sa yuta o mga mangaputol nga kahoy diha sa dalan o sa kabalayan.
Gitug-an ni Police Major Mercy Villaro ang tigpamaba sa MCPO nga halos sila tanan sa MCPO ang na-train na alang sa disaster preparedness ug ang pagresponde kay dili lang sila kutob paggukod sa mga kriminal.
Hinungdan nga matag estasyon sa unom ka police station sa syudad ug sa matag unit ang aduna gyud gitahasan nga team nga maoy moresponde, ilabi na kon adunay I-rescue.
Apan iyang giklaro nga hugot sila nga nakig-alayon sa city disaster risk reduction and management office ug sa kabarangayan.
Samtang niadtong Biyernes, Hunyo 21 ang kapulisan sa MCPO pinanguluhan ni Police Colonel Julian Entoma ang nitabang sa Department of Environment and Natural Resources ug lokal nga kagamhanan sa gihimo nga matag karon ug unya nga padayong paglimpyo diha sa Butuanon river. (FMD)