SAKOP sa EC Labella and Partners Law Office ang nihupot sa mga dagko ug importanteng departamento sa Cebu City Hall sugod Hunyo 30.
Ang EC nagkahulogan og Edgardo Colina nga maoy panagalan ug middle name ni incoming Mayor Labella kansang mga abogado naghupot og mga dagkong kaso didto sa Sandiganbayan ug Korte Suprema.
Gitudlo ni Labella isip City Administrator si Floro Casas Jr., kinsa nagdumala sa law firm dihang napili si Labella pagka-bise mayor niadtong sugod tuig 2013.
Ikatambayayong ni Casas mao si Rey Gealon, kinsa kanhi pangulo sa Cebu City Transportation Office (2015) nga karon maoy City Legal Officer.
Si Jerone Castillo, kanhi City Legal Officer sa panahon ni kanhi mayor ug karon incoming Vice Mayor Michael Rama, maoy mangulo sa City Treasurer’s Office sanglit usa sab siya ka certified public accountant (CPA).
Katapusang partner sa EC Labella mao si June Maratas kinsa gitawag sa umaabot nga mayor og legal luminary maoy modumala sa Department of General Services( DGS), ang posisyon nga ibakante ni Ronald Malacora.
Laing abogada ang anaa sa administrasyon ni Labella mao si Maru Salvatierra kinsa maoy posibleng mahimo nga chief of staff. Laing abogado ang posibleng itudlo aron maoy mangulo sa City Assessor’s Office.
Si kanhi City Accountant Mark Salomon maoy gitudlo nga mahimong City Budget Officer nga usa sab ka CPA.
Mangulo sa City Accounting Office mao si Jerome Ornopia, usa ka professor sa Accountancy sa University of San Carlos samtang mabalik sa iyang pwesto si Dr. Daisy Villa sa City Health Department.
Bugtong department head nga mahabilin sa iyang pwesto mao si Kenneth Enriquez sa Department of Engineering and Public Works (DEPW) ug si Florante Catalan ang mangulo sa Office of the Building Official (OBO).
Mangulo sa Public Information Office (PIO) mao si Razel Cuizon kinsa kanhi reporter ug anchor sa dyRC ug kanhi reporter sa SunStar Cebu ug tinun-an sa College of Law sa University of San Jose Recoletos.
Si Labella nagakanayon nga iya ra unyang ipahibawo ang ubang pangalan nga maoy motabang kaniya pagdumala sa siyudad sa Sugbo. (PAC)