Mangrehistro og balik ang Commission on Elections sa tibuok nasod sa kwalipikado nga mga botante sa barangay ug Sangguniang Kabataan (SK) elections sa Mayo sa 2020 sugod sa Agusto 1, 2019.
Matod ni Cebu Provincial Election Supervisor Lionel Marco Castillano nga molungtad ang duha ka buwan nga pagpangrehistro hangtod sa Septiyembre 30.
Ang wala pa marehistro, mobalhin og registration, magpausab sa ilang entry ug estado, ang mahimo moadto sa nagkadaiyang mga buhatan sa Comelec nga bukas sa maong panahon.
Bukas ang Comelec gikan sa Lunes hangtod sa Sabado ug holidays.
Sa mga kwalipikado nga magparehistro kinahanglan magdala og balido nga identification card.
Sumala ni Castillano kadtong mga SK nga 17 anyos nga narehistro na kay dili na kinahanglan nga magparehistro.
“Kay inig 18 nila, kon mo 18 sila before May elections, sulod na sila sa among voters’ list,” pasabot ni Castillano dihang nahinabi sa mga tigbalita niadtong Lunes, Hunyo 24.
Sa miaging eleksyon niadtong Mayo 13, 2019, niabot og 3,082,621 ang rehistrado nga mga botante sa Sugbo, apil na niini ang highly urbanized nga mga siyudad sa Sugbo ug Lapu-Lapu.
Si Castillano nanghinaot nga tugotan gihapon sila sa mga mall nga makapahigayon og registration nga unang nitugot nila sa nangaging pagpangrehistro.
“Mas maayo gyud unta para convenient sa mga botante. Usually mas nindot na siya three days before sa end (sa registration) adto na mi sa mall,” dugang ni Castillano. (SCG)