Tubag sa Comelec En Banc gihuwat

ANG kampo ni Allen Canoy nga maoy petitioner pagkanselar sa certificate of candidacy (COC) ni Councilor-elect Alvin Arcilla ang nakaduso na sa ilang motion ngadto sa Comelec En Banc aron sa pagpangayo sa writ of execution niadtong Biyernes, Hunyo 21.

Kini ang gitug-an ni Canoy kinsa taga barangay Apas human usab nigawas ang certificate of finality sa susamang adlaw diin nahimong final and executory ang resolution nga gipagawas sa En Banc niadtong Mayo 28 nga nagkansela sa COC ni Arcilla.

Ang kampo ni Canoy naghuwat nalang kon unsay tubag sa ilang giduso nga motion ngadto sa En Banc samtang ang kampo ni Arcilla nakaduso na sab sa ilang motion ngadto sa Supreme Court sa tinguha nga mabali ang decision sa En Banc.

Si Canoy nanghinaot nga molusot na usab ang decision sa En Banc may labot sa susamang kaso nga iyang gisang-at batok ni Councilor-elect Sisinio Andales kinsa sama ni Arcilla, iyang hihulgway nga hingpit nang nakaserbisyo sa ilang tulo ka termino nga gilangkuban og siyam ka tuig bisan kon nasuspenso sila og 43 ka adlaw.

“Nganong padayunon mana nato sila nga naka three terms naman na sila? Dili nani tinarong nga pagserbisyo ug naa nani silay personal interest,” matod pa ni Canoy.

Si Arcilla unang napili niadtong tuig 2010 kauban ni Andales ubos sa Bando Osmeña Pundok Kauswagan ug gisundan niadtong tuig 2013, 2016 ug nisubli pagpapili niadtong Mayo 13 ug nidaog.

“Si Andales abogado man unta ni siya apan nganong iyang gibuhat, dako ning sagpa sa iyang part kay attorney gud ni siya,” saway sa maong petitioner.

Sila nangangkon nga nabalda kon naputol ang ilang termino sanglit nasuspenso sila niadtong Mayo 17 tuig 2015 may labot sa tag P20,000 nga ilang giaprobahan sa konseho para ihatag sa dul-an 5,000 ka empleyado sa City isip calamity assistance gumikan sa bagyo ug linog niadtong tuig 2013.

Si Atty. Marchel Sarno, election officer sa north district nagkanayon nga magpbilin nga konsehal si Arcilla hangtod nga wala pay writ of execution nga iisyu ang En Banc samtang padayon pa nga gihusay sa Supreme Court ang iyang appeal.

Sa writ of execution, malatid sa hukom sa En Banc ang molangkob sa Board of Canvassers nga maoy mopahurar sa mohulip ni Arcilla.

Niining bahina, ang makabenepisyo sa kaso nga gisang-at ni Canoy mao si outgoing City Councilor Jerry Guardo kinsa naoy ika-9 sa niaging piniliay.

Kon molusot na usab ang decision batok kang Andales kinsa nag-ung-ong na sa En Banc ug ma-isyohan og certificate of finality ug writ of execution, mabolahan si outgoing City Councilor Joel Garganera kinsa ika-10 sa niaging eleksyon.

Si Guardo sa iyang bahin niingon nga maghuwat ra siya kon unsay resulta sa desisyon sa En Banc ug kon unsay sunod nga lakang sa Comelec sanglit siya ug si Arcilla managsama og partido ilawom sa BOPK.

Apan si Guardo una rang niingon nga mosuporta siya sa administrasyon ni incoming mayor Edgardo Labella.

Mao sab ang baruganan ni re-elected City Councilor Dave Tumulak kinsa nipadayag sa iyang pagduyog sa umaabot nga administrasyon.

Ang Barug PDP-Laban ni Labella adunay pito ka konsehal nga napili niadtong Mayo ug kon makabalik si Garganera mahimong 8 pun-an sa boto ni Guardo ug Tumulak, mahimo nang 10 kansang numero mahimong mayoriya sa panahon sa binotahay labi na sa pag-aproba sa sunod nga Annual Budget ug ubang programa ug proyekto nga pangayuon ni Labella sa konseho.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph