SECTIONS
Thursday, July 18, 2019
SUPERBALITA CEBU

14th PB sa Sugbo nanamilit

BISAN kon init na ang tinubagay ug mga debate sa mga miyembro sa 14th Cebu Provincial Board sa pipila ka hisgutanan atol sa sessions, wa makasuway si outgoing Bise Gobernador Agnes Magpale nga madukdok ang gavel isip maoy presiding officer.

Usa kini sa iyang gipahimug-atan atol sa turnover sa gavel human sa iyang farewell speech sa katapusang regular session sa 14th Sangguniang Panlalawigan sa session hall sa Legislative Bldg., niadtong Lunes sa hapon, Hunyo 24.

Matod niya, bisan og managlahi sila og mga partido sa pulitika sa iyang mga kauban sa PB, nakita niya ang kinasingkasing nga pagpangalagad, pagka professional, ug pagka-productive sa mga bokal.

Sigon ni Magpale bisan kon managlahi ang mga panahom ug opinyon sa usag-usa sa pipila ka hisgutanan sa miaging pito ka buwan dihang naghinangat ang piniliay niadtong Mayo, nakalingkawas sila ug nakakita nga usa lang ang ilang tumong ug nagkaabot ang ilang mga hunahuna, ang pag-alagad sa ilang mga konstituwente.

Sa pagtapos sa iyang 24 ka tuig isip tigpanday og mga balaod sa kagamhanan sa lalawigan sa Sugbo, si Magpale nanugon sa mga molangkob sa 15th SP nga ipabilin ang kagawasan ug integridad sa Legislative Department sa tanang higayon.

“Go out and be with your people in the district. By being with them, listening to them, and seeing their actual conditions, you can surely gather ideas suitable for your legislative agenda,” laing tugon ni Magpale sa iyang mga kauban, kinsa ilang gitan-aw nga maoy ilang inahan sa PB.

Sa buwag nga pakigpulong ni outgoing governor ug umaabot Bise Gob. Hilario Davide III, siya nagpasalamat sa mga bokal sa nitabang ug nisuporta sa iyang administrasyon sud sa unom ka tuig.

Si Davide nanghinaut nga maayo ang ilang relasyon sa executive department nga pangulohan ni Governor-elect Gwendolyn Garcia.

“Gusto ko makig-friend niya. Pero og dili siya, di pud ko mamugos,” pahayag sa umaabot nga presiding officer sa 15th SP, sa iyang pakigpulong.

Si Davide subling nipasalig nga dili mobabag sa mga proyekto ug programa sa mosunod nga administrasyon basta makaayo sa mga Sugbuanon.

Atol sa katapusang session, giila ug gipasidunggan si Bise Gob. Magpale ug ang outgoing board members. Kini mao sila si Alex Binghay (1st district); Sun Shimura (4th district); Jude Thaddeus Sybico (5th district); Glenn Bercede (6th district); ug Earl Tidy Oyas, ex-officio member isip presidente sa Philippine Councilors League (PCL) Cebu Chapter.

Si Binghay, naa sa iyang ikatulo ug katapusang termino isip bokal, nidaog pagka mayor sa lungsod sa Balamban, si Shimura, naa usab sa iyang katapusang termino, nidaog pagka mayor sa lungsod sa Daanbantayan; si Bercede nidaog pagka bise mayor sa siyudad sa Mandaue; si Oyas, pagka bise mayor sa lungsod sa Catmon; ug si Sybico, natapos ang katapusang termino, wa modagan sa miaging piniliay niadtong Mayo 13.

Si Sybico sa iyang pakigpulong, nibalik lantaw sa iyang gipangbuhat sa dihang bag-o pa siya nisud sa pulitika hangtod nahimong marjority floor leader sa PB.

Matod niya, sa siyam ka tuig niya nga bokal, wa siya makasuway og absent sa pagtambong sa session.

“Even when my father died and we had a session, I had to be here. I value it because a lot of our constituents, the LGUs are depending on us,” pamulong ni Sybico. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph