TULO ka mga sakop sa New People’s Army (NPA) ug usa ka sundalo ang namatay, ug laing tulo ka mga rebelde ang nadakpan sa engkuwentro nga nahitabo human sa medical mission sa lungsod sa Manjuyod, Negros Oriental niadtong Biyernes, Hunyo 21.
Ang medical team gikan sa Police Regional Office (PRO) 7 nipahigayon og medical ug dental mission sa Manjuyod sa tibuok adlaw niadtong Hunyo 21.
Unang engkwentro nahitabo sa Barangay Talalak, lungsod sa Sta. Catalina niadtong Biyernes, Hunyo 21, diin giatake sa mga armadong grupo ang patrol base sa 12 Infantry Batallion (IB) nianang alas 5:00 sa kaadlawon.
Ang nakaengkwentro sa mga rebelde mao ang kasundalohan nga nadistino sa dapit ug nag-abag sa paghatag og libreng pagpanambal.
Daling nitubag ang kapulisan sa Sta. Catalina aron moabag sa mga sundalo sa 12 IB.
Gilabay og granada ang kampo apan wala kini mobuto.
Dihang nibawos ang mga sundalo uban sa pwersa sa kapulisan, nisibog ang mga rebelde human duha sa ilang mga sakop ang namatay, diin usa niini giila nga si Antonio Cardinas.
Pagka Sabado, Hunyo 22, laing engkwentro ang nahitabo sa Barangay Bantolinas, Manjuyod, usa ka kilometro lang ang gilay-on gikan sa dapit diin ilang gipahigayon ang dental ug medical mission.
Napatay ang usa ka sundalo nga si Corporal Leoter Cagape sa 94th Infantry Batallion samtang samdan usab silang Private First Class Cris Emmanuel Paja ug Private Debyl Reyes.
Matod ni Brigadier General Ignacio Madriaga, kumander sa 302nd Brigade Philippine Army (PA), ang naengkwentro sa mga sundalo mao ang grupo sa Leonardo Panaligan ug Apolanario Gamaitan Command nga naglihok sa Negros Occidental ug Negros Oriental.
Si Police Brigadier General Debold Sinas, direktor sa PRO 7, nipasangil sa mga NPA nga usa ka adlaw sa wala pa ang medical mission, nipahigayon og checkpoint ang mga rebelde aron hadlokon ang mga residente aron dili motambong sa maong kalihukan.
Nabantayan sa kapulisan nga nianang buntag walay nanambong ug pagkaudto na nagsugod sa pagpangabot ang mga tawo apan pulos na mga lalake.
Sukwahi sa nanglabay nga mga medical mission sa Negros nga adunay nga inahan ang nanguyog sa ilang mga anak nga gipatuli, dugang sa ilang obserbasyon.
Nianang pagka gabii sa Sabado samtang nagpahigayon sa ilang concert ang mga pulis sa Bantolinas, nahitabo na usab ang engkuwentro tali sa mga NPA ug mga sundalo
Nilanat og kapin sa usa ka oras ang engkwentro ug sa pagka buntag sa samang adlaw, nakuha ang mga armas lakip na ang mga gamit sa mga NPA sa dapit diin nahitabo ang engkwentro nga mikalas usab sa usa ka sundalo nga si Corporal Leoter Cagape sa 94th Infantry Batallion.
Lakip sa nakuha sa mga sundalo ug kapulisan kadtong mga botelya sa juice nga ilang gipanghatag sa mga tawo nga mitambong sa medical mission.
Nagpasabot lang nga pipila sa mga rebelde nagpa-check-up atol sa medical mission, sumala ni Sinas.
Adunay mga improvised explosive device (IED) ang nakuha sa kapulisan ug militar nga mao unta kini gamiton sa pag ambush kanila.
Tungod niini, gikondinar sa kasundalohan ug kapulisan ang gihimo sa mga rebelde tungod sa pagkaangin sa mga sibilyan.
Bisan sa gihulagway ni Sinas nga pagpang-harass sa mga rebelde, apan nahimong malampuson ang ilang medical ug dental mission ug nagtinguha pa siya nga ipadayon kini sa mosunod pa nga mga adlaw.
Ang tulo ka mga rebelde ang naa na karon sa kustodiya sa militar ug gitakdang pasakaan kini og kaso karong semanaha.