Jaclupan facility 92% nang naulian

HUMAN sa tulo ka buwan nga problema sa water supply subay sa kainit dala na usab sa weak El Niño phenomenon, anaa na sa 92 percent ang water supply nga nabalik sa Jaclupan facility, samtang anaa na lang sa 8,000 cubic meters ang kuwang nga tubig supply sa Metropolitan Cebu Water District (MCWD) sa inadlaw nga total average production sa tubig niini.

Sa labing uwahi nga datus sa MCWD, niabot na sa 30,000 cubic meters ang ma-supply matag adlaw sa Jaclupan facility sa dakbayan sa Talisay ug gilauman nga sa nagpadayon nga bunok sa uwan, hingpit na nga mahibalik ang normal nga supply niini nga 33,000 cubic meters matag adlaw sa dili pa mahuman ang buwan sa Hunyo.

Ang 30,000 cubic meters nga supply sa tubig susama kini og 30,000 ka mga pamilya o panimalay nga anaa’y tulo o upat ka miyembro nga konsumidor sa water utility.

Samtang ang Buhisan Dam sa dakbayan sa Talisay anaa pa sa 30 percent sa orihinal nga normal nga kapasidad niini ang nahibalik sa water supply.

Sa uwahing datus sa MCWD, nagpabilin nga 2,000 cubic meters ang masupply sa maong dam nga maoy unang naapektohan dihang niigo ang El Niño phenomenon inubanan sa panahon sa ting-init niadtong buwan sa Marso.

Sa pagkakaron, niabot na sa 230,000 cubic meters ang total nga ma-supply sa MCWD itandi sa total ang average production niini nga 238,000 cubic meters matag adlaw.

Samtang karong Biyernes, Hunyo 28, gipahimangnoan na sa MCWD ang pipila ka konsumidor niini nga maapektohan sa siyam ka oras nga scheduled water service interruption.

Sugod alas 8 sa buntag hangtod alas 5 sa hapon, mawagtangan og tubig supply ang pasaka ug sudlunon nga bahin sa lungsod sa Liloan, Consolacion, Mandaue City, Lapu-Lapu City, Mabolo (lower portion), North Reclamation Area, pier area, Carreta, M.J. Cuenco Ave., Lorega-San Miguel, T. Padilla, Tejero, Tinago, ug pipila ka parte sa Imus Road, Cebu City.

Kini tungod sa power outage sa mga atabay sa MCWD sa lungsod sa Liloan. (Herty B. Lopez)