INIT nga panahon subli na usab nga masinati ning semanaha sa Central Visayas human sa pipila ka adlaw lang nga sagunson nga pag-ulan-ulan.
Matud sa Philippine Atmospheric, Geophysical and Astronomical Services Administration (Pagasa), ang Sugbo adunay temperatura nga 26 to 33 degree Celsius ug heat index o kainit nga mabatyagan sa tawo nga 40 to 42 degrees Celsius sa adlawan.
Kini bisan pa man kon anaa pa sa nasud ang low pressure area (LPA) nga nasigpatan diha sa may silangan sa Aparri, Cagayan ug gilantawan nga mogawas sa nasud karong Huwebes, Hunyo 27.
Apan gikinahanglan gihapon ang kanunay nga pagdala og payong o kapute, kay gitug-an ni Jhomer Eclarino, ang weather specialist sa Pagasa-Mactan, nga anaa gihapon ang kalit nga pag-ulan, pagpanugdog ug kilat sa hapon, sa gabii o sa kaadlawon tungod sa localized thunderstorm, kon mga namugnang panganod tungod usab sa kainit sa panahon.
Ang Western Visayas ang makasinati gihapon og mga pag-ulan-ulan tungod sa hanging habagat nga nabira sa LPA.
Samtang aduna gihapon gamay nga kahigayunan nga mahimo pa nga bagyo ang LPA sa dili pa kini hingpit nga makagawas sa nasud karong Huwebes, Hunyo 27, matud sa Pagasa.
Hinuon, bisan kon mahimo pa kini nga tropical depression, matud ni Eclarino nga wala na kini direktang epekto sa nasud. Ang LPA ang gilantawan nga mogawas sa nasud padulong sa Japan.
Samtang lain pa nga mga pundok sa panganod nga anaa pa sa gawas sa Philippine area of responsibility ang gimonitor sa Pagasa.
Ang mga pag-uwan niadtong weekend ug Lunes sa hapon, Hunyo 24, ang nakapadugang sa gidaghanon sa nasukod nga ulan sa Sugbo, nga niabot na karon sa 85.1 millimeters.
Apan ubos gihapon kini sa average rainfall measurement alang sa bulan sa Hunyo nga 190.4 millimeters. (FMD)