ORMOC CITY, Leyte -- Bisan sa naglain nga panahon, gidagsa sa liboan nga mga manan-away ang Ormoc City Piña Festival 2019, Dominggo, Hunyo 23, 2019.
Si Police Colonel Armel Gongona, direktor sa Ormoc City Police Office niingon nga naa sa 40 mil ka tawo ang nisaksi sa maong festival.
Kini gikan sa street dancing competiton hantud na sa ritual dance showdown sa plaza.
"Kung isasama pa natin yung mula sa City Hall, sa mga dinaanan hanggang plaza nasa 40,000 yun," matod ni Col. Gongona.
Walay mga dagkong panghitabo nga naitala ang kapulisan.
"Nakakapagod pero iba yung pagod na masaya ka," dugang ni Gongona.
Alas 4 sa hapon gisugdan ang street dancing gikan City Hall, agi sa dan Real, liko sa dan Bonifacio ug nahuman sa plaza.
Nag una sa parada ang mga opisyal sa dakbayan pinangulohan ni Mayor Richard Gomez ug asawa nga si Cong. Lucy Torres-Gomez.
Nagsunod ang walo ka contingents lakip na ang mga kandidata sa Miss Ormoc 2019.
Nisamot og kabaga ang mga manan-away sa dihang niapil usab sa parada ang aktor nga si Joross Gamboa ug Akihiro Blanco.
Gisunod pagka alas 6 sa gabii ang ritual dance showdown.
Managlahi ang nauyonan sa mga nanan-aw ug dunay uban nga naglibog kay parehas maayo ug nindot ang mga contingents.
Apan nilanog ang kaaligre tungod sa special performance sa Philippine Coast Guard diin uban nila ang nisayaw og pina macho samtang ang uban nisayaw og Hula Dance.
Nahugyaw usab ang mga tawo sa dihang mi host ug miharana kanila si Joross Gamboa ug Akihiro Blanco sa awit nga Hinahanap Hanap Kita.
Apan human niini, nihulip ang kakulba gumikan kay i-anunsyo na ang mga nakadaog.
Best in Festival Costume si Nova Manulat sa ang Linao National High School nakadaug og P10,000.
Sa mga Special Awards, Best Choreographer ug Best Contingent Costume ang STI ug Best in Audio Van ang Linao NHS.
Sa Piña Festival Queen, 2nd runner up ang STI; 1st runner up ang Linao NHS ug kampyeon ang Liloan National High School nga nakadawat og P35,000.
Sa Best in Street Dancing, nahimong kampyeon ang STI nga nakadawat og P50,000.
Katapusan ang Ritual Dance Showdown, diin 2nd runner up ang Linao NHS nga dunay P300,000; 1st runner up ang Eastern Visayas State University-Ormoc Campus nga dunay P400,000 ug kampyeon ang STI nga dunay P500,000.
Gitapos ang aktibidad sa usa ka engrande nga fireworks display nga gidunganan sa pagpanayaw sa mga tawo. (JKDP)