NATIKYAOB ang usa ka cargo vessel sa pantalan sa Solid Earth Development Corporation (SEDC) sa Barangay South Poblacion, lungsod sa San Fernando, Martes sa hapon, Hunyo 25.
Anaa sa uwahing batch na unta sa gikarga nga semento dihang nahitabo ang pagtikyaob sa MV Eva Mary Grace alas 4:37 sa hapon niadtong Martes.
Matod ni Lieutenant Junior Grade Michael Encina, tigpamaba sa PCG-Central Visayas, nga posibleng nawagtangan sa balanse ang barko atol sa pagkarga sa semento hinungdan nga nitakilid kini.
Luwas na ang 12 ka mga tripolante sa cargo ship.
Naangol si Manuel Incarnacion, crane operator.
Unang gikataho nga nahabilin si Incarnacion sa ilawom apan naluwas ra kini ug daling gidala sa South General Hospital.
Si Captain Michael Zeta ang kapitan sa barko.
Alas 4:40 sa hapon dihang nipadala ang Coast Guard Central Visayas sa ilang Quick Response Team sa dapit.
Lakip kini sa Coast Guard Marine Environmental Unit, Special Operations Unit ug Coast Guard Medical Team.
Niresponde na usab ang Naga Coast Guard aron pagtabang sa barko.
Aduna’y 12,000 nga automotive diesel nga nayabo sa dapit apan daling nakabutang og oil spill boom ang Coast Guard Marine Environmental Unit.
Dugang ni Encina nga malusaw ra ang lana itandi sa crude oil.