NAGBANGIS dayon ang Sugboanong si ex-PBA Macmac Tallo sa labing una niyang duwa sa Maharlika Pilipinas Basketball League (MPBL) Lakan Cup ug iyang giagak ang Bacolod Master’s Sardines sa 87-83 nga kadaugan batok sa Mindoro Tamaraws niadtong Lunes sa gabii sa San Andres Gym sa Manila.
Ang Master’s Sardines ug Tamaraws pulos bag-ong teams ug ningsagubang sa labing una nilang duwa sa liga.
Si Tallo, kinsa kanhi magduduwa sa NLEX Road Warriors sa Philippine Basketball Association (PBA), nagpakatap og 31 puntos sa 13-of-21 shooting aron pangulohan ang Master’s Sardines.
Gawas sa iyang opensa, ang produkto sa Southwestern University (SWU)-Phinma Cobras nakamugna sab og unom ka assists, unom ka steals ug upat ka rebounds.
Ang laing ex-PBA nga si Mac Baracael maoy nangulo sa Tamaraws pinaagi sa iyang 23 puntos.
Sa laing duwa, gipangmakmak sa host ug mas inilog nga Manila Stars ang Nueva Ecija-MiGuard, 96-86. (ESL)