BISAN naa siya sa gawas sa nasod, ang nagkabantugang Sugboang assistant coach nga si Ryan Betia wala mopaltos sa pagpahimangno sa iyang mga batos sa Far Eastern University (FEU) Tamaraws kabahin sa pagsalmot niini og dakong torneyo sa Bayugan City.
Ang Tamaraws usa sa lima ka teams nga mokombati sa torneyo nga giulohan og Mayor’s Cup Invitational Basketball Tournament nga sugdan karong adlawa sa Lope Asis Memorial Gymnasium sa Poblacion, Baguyan City.
Gipasabot ni Betia, kinsa assistant coach sa Tamaraws ug sa Gilas Pilipinas, nga ang ilang pagsalmot sa torneyo tipik sa ilang preparasyon alang sa umaabot nga bag-ong season sa UAAP.
“Miapil mi ani para sa among preparasyon sa UAAP. Akong advice sa players nga ipagawas gyud ang tanan nilang makaya,’ matod ni Betia sa iyang mensahe sa Facebook messenger alang ning mantalaan.
Si Betia kasamtangang naa sa Doha, Qatar alang sa kampanya sa Gilas Pilipinas Youth sa FIBA Under-19 World Cup.
Sa Bayugan tournament, ikaharong sa Tamaraws ang duha ka teams sa Cebu Schools Athletic Foundation Inc. (CESAFI) nga mao ang Mair Construction/University of Cebu (UC) Webmasters ug Vincare Pharma/Phinma Southwestern University (SWU) Cobras lakip na ang Madyaw Construction/Valenzuela Classics ug HMMED Enterprise/Cagayan de Oro.
Ang torneyo, nga gisuportahan sa Bayugan local government pinangulohan ni Mayor Kim Lope A. Asis, nagdalit og dul-an sa P600,000 nga kinatibuk-ang ganti. (ESL)