SA MIAGING semana, wa dahuma nagkatagbo ang isda ug ang luwag. Just imagine, nagkita mi sa akong tinun-an human sa paglabay sa 50 ka mga tuig. Sa tanang dapit didto pa gyud sa ospital.
Ako, uban sa akong asawa, nagpahigayon sa among periodic doctor’s check-up ug siya sa iyang inahan nga matod niya 93 na ang panuigon. Sa cardiac unit gipaubos ang inahan sa 2-D Echo sa kasingkasing. Ako nagpaabot sa akong eskidyol.
Taliwa sa kasual nga kukabilduhay nasaag ko sa pagpangutana sa ilang dapit kon tagadiin siya.
Dinhi naugkat ang panaghimamat. Siya si Gloria Vernaiz, taga Cansojong, Talisay City.
Nagkatawa nga nagtutok siya nako. Sir, di ko malimot nianang imong awom. Di pa gitap-il ka man namo, Sir, sa guwapa namong maestra? Husto, nahinumdom ko sa guwapa nakong co-teacher.
Apan kalit gikusi ko sa akong asawa monang wa ko kapangumosta sa guwapa kong co-teacher nga matod niya dakong buhi pa. Di baya hibintahan sad ang akong kapikas kay kanhi ROTC Cdt. sponsor.
Gikan ni Gloria nahibaw-an ko nga patay na si Mrs. Guadalupe Almagro Canton, ang tag-iya sa Talisay Malayan Academy diin ako unang nakatudlo human sa kolehiyo. Dako ang akong kahingangha. Wa ko kahibawo nga unta duol man ko sa tinubdan sa kasayuran.
Di ko kalimot ni Mrs. Canton tungod sa iyang motherly management isip school administrator. Didto ko makat-on niya sa ABC sa student discipline ug sa parental relationship nga nakabaid sa akong tactfulness.
Nagamit nako ni sa media relations dihang nahimo kong PR man sa usa ka ahensiya sa pagkaon. Daghan kong nakat-unan niya. Usa niini ang basic human relations. No barrier ang iyang pagtagad sa tawo.
Sa akong paniid matinagdanon siya. Despite sa iyang social stature. Nahibawo kaayo ko sa Almagro family nga landed sa Mantalungon, Dalaguete. May suod kong higala nga si Dr. Urias Almagro nga blood related niya.
Kumosta na kaha usab sa akong mga co-teachers kanhi sa Malayan? Sila Mrs. Clarissa Bartolaba Magno, Mrs. Carolina C. Fernandez, Mrs. Fe A. Ouano ug uban pa.