SIKOP ang usa ka regular nga empleyado sa lokal nga kagamhanan atubangan mismo sa city hall niadtong Hunyo 24 mga alas 5 sa hapon sa Gaston Park, Barangay 1, dakbayan sa Cagayan de Oro.
Ang dinakpan naila nga si Candido Echalico Alyas Ondoy o Istigoy, 51, minyo, taga Zone 6, ning siyudad.
Sa nahipos nga impormasiyon giingong nasikop si Echalico human napalitan og ilegal nga druga nga mokantidad og P2 mil ug nakuha usab gikan sa iyang posisyon ang cellular phone, P380 nga gipanag-iyahan niini ug P500 nga buy-bust money.
Nasayran nga ang operasiyon gipahigayon sa Regional Special Operation Group-Northern Mindanao, Police Station 7 ug Crime Against Person and Property Desk inabagan usa sa tinugyanan sa Philippine Drug Enforcement Agency-Northern Mindanao hinungdan sa malampusong pagkasikop sa suspek.
Ang maong suspetsado ang kasamtangang detinado na sa Maharlika Detention Cell alang sa pag-atubang sa kasong ipasaka batok niini.