HUMAN sa mga nahitabo sa mga movie houses, buot sa Regulatory and Complaint Board (RCB) nga hingpit na nga mamahimong ordinansa ang pagbutang og closed-circuit television (CCTV) camera.
Giingong magamit kining teknolohiya aron nga malikayan ang mga susama niini nga mga panghitabo sulod sa usa ka pribadong lawak diha sa maong mga patigayon ug gawas niana mabantayan usab ang unsa man nga mga ilegal nga kalihokan nga himuon sama sa ilegal nga druga ug uban pa.
Gibutyag ni Antonio Resma Jr., inspectorate team leader, nga kung duna pay CCTV malikayan na nga mahitabo ang mga pakighilawas sulod sa movie house aron nga mamonitor ang ginahimo sa sulod.
“Na prevent unta kung naay CCTV, let’s make use of technology butangan nato og CCTV ang each room,wala man po’y privacy nga madaot ana dili man na nimo garentahan ang area para ingon ta makighilawas ka,” matud ni Resma.
Gidugang pa niini nga magduso na sila mismo og ordinansa aron nga malikayan ang mga ilegal nga butang dili lamang sa pakighilawas apan lakip na ang mga paghimo og drug den ug uban pa.
“Most probably ang istorya namo ni Atty. Egay is we will come up with initial draft na gyud , mo presenta ta og kongkreto nga ordinansa for their evaluation,” dugang niini.