KAMOLO pa og kumbate ang duha ka mga batan-on dihang nasapon sa inspection team sa Regulatory and Complaint Board (RCB) niadtong nilabay nga adlaw sulod sa usa ka movie house sa sentrong bahin ning dakbayan sa Cagayan de Oro.
Nagpahigayon og inspeksiyon ug imbestigasiyon ang RCB kauban ang kapulisan sa mga movie houses ning dakbayan human nikatap ang sex video sa duha ka mga menor de edad niadtong niaging semana nga gihimo sulod sa movie house.
Naka-uniform pa ang 19 anyos nga lalaki kinsa tinun-an sa usa ka unibersidad ning siyudad samtang ang babaye nag-edad og 20 anyos.
Sa pakighinabi sa SunStar Superbalita kang Antonio Resma Jr., inspectorate team leader sa RCB, gibutyag niini nga naaktohan gyud sa ilang team nga naghilawas ang duha sulod sa movie house.
Unang nakita dihang gilili sa kapulisan ang pultahan nga dunay glass ang duha nga maghimo niini hinungdan nga gitawag ang attendant sa maong movie house aron tuktokon ug mahatagan kinig higayon nga maka-ilis.
“Iyang gitawag si Atty. Egay, siya gyud mismo nakakita gyud nga kamulo ang lalaki, sila lugar, kamulo gyud,” matud ni Resma.
“Pagtan-aw nako akong nakita nalang kay kamulo nalang og pantalon to ang lalaki then naka-uniform raba,” dugang niini.
Kabahin niini, atol sa pagpakayab sa bandila sa city hall niadtong Lunes, nanghinaot si Teodoro Sabuga-a Jr., nga wala nay mga sexual activities nga mahitabo sulod sa mga movie houses.
“Mao ng giingon ni Atty Egay nga hinaot nga wala nay sexual activities inside the mini movie houses ug maintain kita sa atong pagka-vigilant niana and we cannot allow that labi na kung naay mga minors,” matud ni Sabuga-a.
Buot usab ipasabot sa RCB nga dili kini sila anti-business ug buot lamang nga mosunod sa ordinansa sa siyudad ilabi na nga hugot ang kampanya niini nga mamintinar ang pagka Child-Friendly City sa siyudad.
Ang movie house nagpakita usab sa kagustohan nga mosunod sa balaod sa siyudad human usab gibalikan og inspeksiyon sama sa pagtanggal sa gitabon sa pultahan ug nag-order na kini og CCTV.
Samtang mag-atubang gihapon kini og multa nga P5,000 mil.