GIANGKON ni 58th Infantry Battalion (58IB) Commander Lieutenant Colonel Roy Derilo nga gikontrolar sa New People’s Army (NPA) ang mga bakwit hinungdan pipila ka pamilya dili maamalik sa ilang lugar sa Sitio Mikamansi, Barangay Banglay lungsod sa Lagonglong Misamis Oriental.
Sa interbyu sa Superbalita Cagayan de Oro kang Derilo, gibutyag niini nga gikan sa 40 ka pamilya kaniadto mokabat na lang sa 10 ka pamilya karon ang nagpabilin nga nagpasilong diha sa usa ka simbahan sa Barangay Macasandig, dakbayan sa Cagayan de Oro human gipapahawa sa Kapitolyo Probinsyal.
Gibutyag niini nga ang ilang mga kauban namalik na sa ilang dapit ug normal na nga nanginabuhi susama sa ilang naandan.
Aminado kini nga ang mga bakwit ilang giprotektahan ug dili nila mahimong mapasakitan.
“Unang una, masuko sila kay gi-charge silag NPA. Dili kami ga-charge kanila wala namo sila palayasa didto. Kami pa gani to gapugong ug sige mi ingon ‘inyo ni area tabangan mo,” matud ni Derilo ug dinhi mibulgar nga gikontrolar sa walhong grupo.
“Kanang bakwit dili na na mamauli kay gikontrol lang na sila. Ang kadaghan sa ila gusto na mouli. Nakontrol sa NPA, naay silay armado ug legal front nga dili armado ang uban nakasulod sila sa NGO,” matud ni Derilo ug miingon nga nasultihan siya kaniadto sa iyang consultant nga usa ka kadre nga himoun og front kining mga bakwit, picturan aron makahimo og project proposals ug manulod ang pundo gikan sa gawas sa nasod alang kanila.
Matud ni Derilo nga kong mawala ang mga bakwit sa Kapitolyo mahunong ang ilang mga suplay ug pangwarta sa nagkontrol kanila ug giingong baka ang pasangil sa mga bakwit nga sila gihasi ug pugson sa pagpatug-an nga sila NPA.
“Ako dako ko nga kristiyanos ug sakristan ko sa christian school wala ko gitudloi sa akong ginikanan sa mga pari ug school sa simbahan nga mag abuso kami ako gani dili motoo giyera,” matud ni Derilo.
“Naa gihapon ang atong mga sundalo sa dapit gapaabot nga tabangan sila nalipay sila nga nanay sundalo mas daghan na ang nanguli kaysa nia diri. They are so thankful nga nakagawas na sila diri ug gusto sila naay sundalo magabantay kanila,” dugang niini.
Sa ilang paningkamot nga kalamboan sa Sitio Mikamansi, gikatakdang mahatagan na og katumanan ang kalsada program gikan sa Department of Agriculture ning tuig.
Dugang ni Derilo nga malipay siya nga mahatagan og dalan ang mga bakwit tungod kay ilang mga pagkaon ilang matugbong ug insakto nga dili mosakay ug habal habal ug dyip nga mahal og pasahe.
Gawas niini, kung kaniadto kinilo lamang nga bugas ang ilang mapalit tungod sa kalayo ug walay saktong dalan ug dili na moincome og halos P637 lamang ang bulan basi sa ilang pagtuon.