LANTAWA ang “Brother of the Year” sa SM City Davao Cinema 1 karong Hunyo 29, 6:30 p.m. ug June 30, 2 p.m.
Ang Brother of the Year usa ka romantic comedy labot sa usa ka igsuong lalaki nga perme nagapanghilabot sa love life sa igsuon niyang babae.
Sukad bata pa siya, si Chut (Sunny Suwanmethanont) nagtuo nga ang gisabak sa iyang inahan usa ka baby brother.
Apan dihang gihimugso kini sa iyang inahan, usa diay kini ka babae.
Nadismaya og maayo si Chut tungod wa na siyay kaduwa sa iyang robots, football ug nahugno ang damgo niyang makaigsuon og lalaki.
Matag higayon nga magduwa sila ni Jane (Urassaya Sperbund) kanunay kining maghilak.
Sukad kaniadto, awayon na ang magsuon.
Mao kini ang rason nga gitago ni Jane ang iyang relasyon kang Moji (Nichkhun Horvejkul), ang iyang half-Japanese boyfriend, gikan kang Chut.
Di buot ni Jane nga maguba ang iyang relasyon tungod sa pagsinamok ni Chut.
Apan way sekreto nga matago hangtud sa hangtud.
Atangi ang makalingaw nga istorya sa magsuon sa paglantaw sa pelikula.