DIHANG hilom kaayo ang atong pinanggang Pangulo Rodrigo Duterte sa nahitabo sa Recto Bank (Reed Bank) diin giingon nga gituyo pagbangga sa barkong panagatan sa mga Intsik ang banka sa mga Pinoy, grabeng kisaw sa mga netizens ilabi na ang mga kaubanan namo sa buhat nga tigdepensa sa gipasira nga Kapa Community Ministry International, Inc.
Suma nila nga bugnaw pa sa simod sa itoy ang pagtagad sa Pangulo sa nahitabo sa mga Pinoy nga mananagat tungod kay nahadlok siya sa China mao nga niingon lang kini nga di na angay imbestigahan tungod kay usa lamang kini ka simple nga maritime accident, apan abtik pa sa kilat ang pangulo sa pagpasira sa ilang relihiyusong pundok nga giakusahan nga pyramiding scam.
Dugang pa nila nga dunay nalapas nga probisyon sa Konstitusyon ang Pangulo mao nga naghuna-huna sila nga mopasaka og impeachment case sa Kongreso.
Gani, nagbahad pa ang uban kanila nga magrebelde sa gobyerno tungod kay gidaug-daug ang mga kabus nga naglaum nga makadawat sa ilang 30 porsyento nga ‘blessing’ matag bulan gikan sa ilang gidonar nga kantidad.
Sa mga nagsaway sa Pangulo labot sa pagpasira sa mga investment companies, ayaw kamo kasuko niya tungod kay gihimo lang niini ang iyang trabaho sa pagmando sa iyang mga sakop sa Securities and Exchanges Commission (SEC), Department of Interior and Local Government (DILG), Philippine National Police (PNP), National Bureau of Investigation (NBI), ug Local Chief Executives (LCEs) nga ipatuman ang balaod batok sa illegal nga operation sa mga investment schemes.
Isip mga tawo, atong sundon ang balaod kay ang balaod gihimo alang sa kaayuhan sa kadaghanan ug ang balaod mangtas apan mao gayud kini ang balaod.
Sa mga miyembro sa Kapa, hulata nalang ninyo nga mahuman ang kaso nga giatubang sa inyong pinangga nga founder, Pastor Joel Apolinario.
Kung maabswelto siya lakip ang mga kaubanan sa inyong ministry, nan, magpasalamat kamo kay makapadayon siya sa pag-alagad kaninyong tanan. Apan, kung mahukman siya/sila tungog sa paglapas sa Securities Regulation Code of the Philippines, nan, pilit ninyong dawaton tungod kay mao kini ang gilatid sa iya/ilang kapalaran dinhi sa kalibutan.
Joint-investigation
Sa hisgutanan nga hiniusang imbestigasyon sa Pilipinas, China ug usa ka independent country sa nahitabo sa Recto Bank, ayaw sab ninyo batikosa ang Pangulo tungod kay nagtamod lamang siya sa mga lagda sa Philippine-China foreign relations.
Ang wa dayon paglihuk sa Pangulo labot sa aksidente sa kadagatan, iya lamang gisubay ang protocol sa foreign relations sa duha ka mga nasud. Kung nagkasabot ang gobyerno sa Pilipinas ug China nga himuon ang imbestigasyon, alang nako, usa kini ka nindot nga katikaran.
Di lang kaayo kita magpalabi sa kabalaka nga di mahimong patas ang imbestigasyon tungod kay duna may independente nga moapil sa imbestigasyon. Lamang, atong bantayan ug hulaton ang resulta sa imbestigasyon.