NALISTA sa Department of Science and Technology-Philippine Institute of Volcanology and Seismology (DOST-Phivolcs) ang kinatibuk-ang 60 ka barangay sa siyudad sa Davao nga nilatas sa Central Davao Fault System, nga gilangkuban sa lima ka segmento.
Ang Central Davao Fault System dunay lima ka segmento naglakip sa Tamugan Fault uban sa 25 kilometro (kms) nga gitas-on ug makamugna og 6.7 magnitude quake; Lacson Fault nga dunay 33 kilometros ug makatay-og og 6.8 magnitude quake; 18-kilometros nga Dacudao Fault nga dunay 6.5 magnitude quake; Pangyan-Biao nga dunay 33 kms ug 6.8 magnitude quake; ug ang 12-kilometro nga New Carmen Fault nga mahimong moresulta og 6.3 magnitude earthquake.
Mga barangay nga nilatas sa Tamugan Fault mao ang Tamugan, Gumalang, Malagos, Baguio, Cawayan, Subasta, Tagakpan, Manambulan, Mulig, Camansi, Alambre, Tagluno, Lizada, Sirawan ug Binugao.
Sa Lacson Fault mao ang mga barangay Lacson, Malagos, Calinan, Wangan, Subasta, Balengaeng, Los Amigos, Angalan, Tugbok, Mintal, Bago Oshiro, Bangkas Heights, Baliok ug Lubogan samtang ang Dacudao Fault mao ang Lamanan, Lacson, Dacudao, Calinan, Talomo River, Riverside, Los Amigos, Ula, Tugbok, Mintal, Sto. Niño, Catalunan Grande, Catalunan Pequeño, ug Talomo.
Samtang ang Pangyan-Baiao Escuela Fault mao ang mga barangay sa Lumiad, Paquibato, Pañalum, Malabog, Sumimao, Dominga, Dacudao, Pangyan, Talandang, Biao Joaquin, Biao Escuela, Biao Guianga, ug Matina Biao bisan ang New Carmen Fault naglakip sa mga barangay nga New Valencia, New Carmen, Matina Biao ug Langub.
Apan si Phivolcs director and DOST Undersecretary Renato Solidum Jr. nagsulti nga ang pagpahawa sa mga molupyo sa bisan asa niining mga fault line mag-agad sa lokal nga kagamhanan sa Davao ug sa mga molupyo. Kasamtangang nagsurbey sila sa fault lines.
Niadtong Lunes, Hunyo 24, Phivolcs, uban sa lain pang mga ahensiya nisubay sa fault line sa Bago Oshiro ug Mintal. Ila sab nga gibutangan og timailhan aron nga madetermina kon asa gyud ang saktong faults nahimutang.
Alang sa iyang bahin, si Mintal Barangay Captain Rey Amador Bargamento nagsulti nga ila una nga idetermina ang ihap sa mga molupyo kon diin ang mga balay natukod sa fault lines. Ila sab nga gipakusgan ang ilang awareness campaign bahin niining maong fault lines.
Gipasalig sa Davao City Disaster Risk Reduction Management Office (CDRRMO) nga kanunay silang nagbinantayon ug andam kon moabot na ang katalagman sa siyudad. (Juliet C. Riveta)