LAAK, Davao de Oro -- Duha ka mga sakop sa gituohang New People’s Army (NPA) ang napatay human giingong nanukol sa dihang gisilbi ang ilang mga warrant of arrest didto sa Brgy. Bagong Silang.
Subay sa taho gikan sa 10th Infantry Division, Philippine Army, upat ka mga warrant of arrest ang isilbi na unta sa Laak Municipal Police Station ug 60th Infantry Battalion (IB) batok sa duruha.
Ang duha ka NPA nailhang mao sila Jay Mendoza ug alyas Roger diin nakuha sa ilang posisyon ang duha ka mga .45 kalibre nga pistola, Uzi sub-machine gun nga dunay magazine ug mga buhing bala, usa ka granada, blasting cap, detonating cord, ug selpon.
Giingon nga si Mendoza maoy gitudlong deputy secretary sa Guerrilla Front 2 sa NPA kinsa nag-atubang sa kasong murder, double murder with double frustrated murder, robbery in band, ug serious illegal detention.
Responsable sab si Mendoza sa pagpatay sa duha ka army officer, 16 ka sundalo, pipila ka pulis, CAFGU Active Auxiliaries ug mga kanhi rebelde gikan 2006 hangtud 2018.
Dugang sa taho nga nalambigit sab si Mendoza sa pagpangsunog sa mining equipment, sakyanan, ug opisina sa APEX Mining sa Maco ug pag-atake sa Dasia Security Agency sa Tagum City niadtong Mayo 2014.
Gawas niini, giingong responsable usab kini sa pangatake sa Governor Generoso Municipal Police Station ug pagdagit sa hepe niini ug pagsunog sa mga ekipo sa minahan sa Banaybanay, niadtong Enero 2018 ug ang pipila ka mga extortion activity sa rehiyon.
Gipasalig sa kasundalohan ug kapulisan nga ipatuman gayud nila ang pagsilbi sa warrant labi na ang paggukod sa mga walhong pundok sa hilit nga dapit sa maong lugar sa mga kasikbit. (Jeepy P. Compio/10thID0