PATAY ang usa ka lalaki kinsa gidunggab sa kapuyo sa pag-uli niini nga hubog sa ilang panimalay alas 11:30 sa gabii niadtong Lunes, Hunyo 24, sa Purok 24, Teachers Village, Calinan, Davao City.
Subay sa report, ang biktima nailhang si Efraim Redolosa Ombayan, 26-anyos, samtang ang suspek mao ang kapuyo nga si alyas Marie (bansagon gitago), 24-anyos.
Migula sa inisyal nga imbestigasyon sa kapulisan sa Calinan Police Station nga hubog dihang miuli ang biktima, kinsa una nang nakita sa kapuyo nga nakig-inom sa ilang silingan.
Dihang pag-uli sa biktima, nasukmatan sa kapuyo, apan giingong nangisog ang biktima hinungdan nga iyang nakulatahan ang babaye.
Sa kapungot sa babaye, mikuha kini’g mahait nga butang dayon iyang gidunggab tumong sa dughan sa kapuyo.
Nadala pa sa Isaac Robillo Hospital sa Calinan ang biktima apan nakabsan ra sab kini sa kinabuhi.
Ang patay nga lawas sa biktima anaa gidala sa Angel Funeral Homes sa Calinan samtang giandam na ang kaso nga ipasaka batok sa suspek didto sa korte.