GIBUKSAN sa Rotary Club of Metro Cebu (RCMC) ang Plastic Barter Store sa Balay Samaritano, dan Mabini, dakbayan sa Sugbo.
Ang maong proyekto gitumong sa pagmenos sa plastic waste nga ibanlas ug maanod sa baha ngadto sa kadagatan sa Sugbo.
Si Adrian Lee, usa ka magpapatigayon ug bise presidente sa RCMC, niingon nga sa plastic barter store, ang mga street children ug school children modala sa mga biya nga plastic aron ibaylo og sinina, toys ug mga school supplies nga gidonar sa mga sakop sa RCMC ug sa mga nagpakabang lungsuranon.
Matod pa ni Lee, niining paagiha, makolekta ang mga basura nga plastic sa di pa kini madala sa baha ngadto sa kadagatan. Ang plastic waste nga makolekta, galingon ug himuon nga hollow blocks nga gitawag og “eco-clocks.”
Nagkanayon si Lee nga nakigtambayayong ang RCMC Cebu Archdiocese Prison Apostolate (CAPA) sa paghimo sa mga eco-blocks kay gihimo kini nga livelihood project alang sa mga kanhi piniriso.
Ang mga eco-blocks nga gihimo ginamit ang biya o basura nga plastic gamiton usab sa pagtukod og mga kasilyas ubos sa “Pansayan sa Katawhan” project sa RCMC alang sa mga tawo nga way mga kasilyas.
Samtang, ang mga kasiyas gidensinyo aron ang hugaw nga makolekta himuon nga compost aron gamitong abuno sa mga tanom o mga utanon sa nataran niadtong gibutangan og kasilyas. (PR)