UBAY-ubay og plano si outgoing Lapu-Lapu City Mayor ug Congresswoman-elect Paz Radaza sa pagpasar og mga balaodnon nga maghatag og importansya sa Oponganong bayani nga si Lapu-Lapu.
Kini aron mas mailhan pa ang kinabuhi niini lakip na ang iyang mga nabuhat sa pakigbisog sa iyang yutang natawhan.
Bukas si Radaza sa posibilidad sa pagduso og mga balaodnon nga mag-awhag sa mga tunghaan sa dakbayan nga ilakip sa ipang-apod apod nga mga libro sa lawak saringanan mao usab ang libro mahitungod sa kinabuhi sa labing unang bayani sa nasod.
Pinaagi niini, mahinumduman ang kinabuhi ni Lapu-Lapu sa mga tinun-an sa mosunod nga mga henerasyon.
Nalipay ang mayor nga sa milabayng katuigan inanay na nga natagaan og pagtagad sa nasudnong kagamhanan ang pagka bayani ni Lapu-Lapu hilabi na ubos sa administrasyon ni Presidente Rodrigo Duterte.
Mohimo siya og mga balaodnon nga may kalabotan sa Oponganong bayani.
Nanghinaot usab ang kongresista nga mapalabang sa Ubos Balay Balaoranan ang balaiudnon nga mag-usab Mactan Cebu International Airport ngadto na sa Lapu-Lapu International Airport. Paghatag kini og bili sa nasudnong bayani.
Wa pa makabalita si Radaza unsa nay update sa naasoyng balaodnon nga gipasar sa mga Sugboanong kongresista niadtong 2018 hinungdan nga kon ugaling makalingkod na siya isip kongresista, usa kini sa mga balaodnon nga iyang buot masusi.
“Mactan is a place that’s why I keep on emphasizing that it has to be on the name of the hero mao ako pa gitan-aw ug asa na nga level karon” matod ni Radaza. (GCM)