MGA eksplusibo nga maoy gamiton unta sa pag ambush sa convoy ni Police Regional Office 7 Director Brigadier General Debold Sinas nga nipahigayon og medical mission sa Barangay Bantolinao, lungsod sa Manjuyod, Negros Oriental napalgan daplin sa karsada.
Nihimo og follow up operation ang kapulisan sa Negros Oriental human sa engkwentro sa mga sakop sa NPA ug mga sundawo sa Barangay Bantolinao niadtong Biyernes sa kaadlawon Hunyo 21.
Sabado sa gabii, Hunyo 22, nakakuha na usab og mga eksplosibo ang mga pulis.
Sa barangay road sa Bantolinao, nakaplagan sa mga sakop sa Explosive Ordnance Disposal sa PRO 7 pinaagi sa pagsimhot sa trained nga mga iro ang mga improvised explosive device (IED) nga gipanglubong sa karsada.
Lakip sa nakuha nila ang wires nga maoy gamiton sa pagpabuto sa mga eksplusibo.
Matod ni Sinas nga sila maoy target sa mga rebelde apan napakyas human sila mamatikdi sa mga awtoridad busa nangangi sila sa laing highway.
“Makita nimo nga they are meant to kill. So maayo gani na recover. Could you just imagine kon pila ang mabiktima ani nga mga pulis ug sundalo,” matod ni Sinas.
Matod ni Police Major John Abreu, EOD head sa PRO 7, ang maong matang sa bomba momugna og dakong kadadaut sa pag agi sa convoy sa sakyanan ni Sinas.
“Kung dumaan yung convoy at sasabog itong bomba na ito, malaki ang damage talaga,” matod ni Abreu.
Nagtuo gyud si Sinas nga di gusto ang mga rebelde nga mohimog medical mission ang mga pulis ug kasundalohan sa bukirang dapit sa Manjuyod nga naila nga adunay presensya sa mga NPA.
Apan bisan pa niini, magpadayon ang ilang medical mission sa Negros Oriental aron makatilaw usab ang mga kabus sa mga tambal nga wa nila matilawi nunot sa kahadlok sa mga rebelde.