USA ka driver ug usa ka pasahero ang nanga-angol samtang tulo ka mga bus depasaheroan nga paingon sa habagatang-kasadpang Sugbo ang gipangbato sa mga wala mailhing tawo atol sa pagsaulog sa kapisatahan ni San Juan Bautista niadtong Lunes, Hunyo 24.
Mao kini hinungdan nga nisuspenso sa ilang operasyon ang pipila ka mga bus operators nga mobiyahe sa maong dapit sa mao nga adlaw aron kalikayan ang kadaot.
Matod sa tagdumala sa Cebu South Bus Terminal nga si Joy Tumulak, mga sakyanan nga gipanag-iya sa Calvo Bus Lines ang nangabiktima.
Unang pagpamato nahitabo alas tres sa kaadlawon sa Lutopan, dakbayan sa Toledo diin botelya sa beer maoy gilabay ngadto sa bus.
Niresulta kini sa pagkabuak sa windshield ug pagkasamad sa driver ug ingon man sa laing pasahero.
Ang ikaduhang insidente nahitabo alas 7 sa buntag sa susamang dapit. Sa gihapon maayo usab nga pagkagupok sa windshield sa bus.
Matod ni Tumulak, ang maong mga insidente niadtong buntag sa Lunes maoy naka-aghat kaniya pagtaho niini ngadto sa Cebu Provincial Police Office ug mismo ngadto sa director sa Police Regional Office 7 nga si Police Brigadier General Debold Sinas.
Matod pa, gipaad-an gilayon og mga pulis ang maong dapit aron pagsiguro nga dili na kini makapamiktima pa ug laing mga sakyanan.
Apan nausban man lang gihapon pagka-alas 7 sa gabii ug niining higayona, sa bukirang habig na usab sa siyudad sa Naga.
Nanawagan si Tumulak sa publiko nga kung magsaulog sa kapistahan ni San Juan o sa bisan unsang kalihukan, nga dili lang unta sagulan og binoang aron dili usab maka-purhisyo sa ubang tawo.
Gipanawagan sab niya ang kapulisan ug ang mga barangay officials nga mohimo na lang ug inisyatiba panahon nga saulogon ang maong pista kay halos matag tuig, duna gyuy mahitabo nga pagpanglabay og tubig nga ipangsud sa bisan unsang sudlanan, nga makabasa o makaangol na hinuon sa uban.
“Nahibalo na man ta nga mao na ni siyay perming buhaton niining mga tawhana matag tuig, matag selebrasyon, so siguro moawhag lang ta nila nga mohimo dayon og aksiyon nga dili na lang paabuton nga naay madisgrasya,” padayag ni Tumulak. (AZLG)