ITUDLO ni Mayor-elect Edgardo Labella ang usa ka magpapatigayon ug kanhi pulis opisyal para maoy modala sa Cebu City Transportation Office (CCTO).
Kasaligang tinubdan niining mantalaan kinsa usa sa labing suod ni Labella nagkanayon nga itudlong executive director sa CCTO mao si Ricardo Barandog Jr. ug iyang ikatambayayong si retired Police Major Andres Bayarcal .
Si Barandog maoy mohulip kang executive director Atty. Esmael Garaygay samtang si Bayarcal moasumir sa pwesto nga biyaan ni Franciso Ouano isip chief of operations.
Si Ricardo igsuon ni Police Major Chuck Barandog, commander sa City Mobile Force Company ( CMFC) samtang si Bayarcal kanhi hepe sa Traffic Patrol Group (TPG) sa Cebu City.
Matod sa source, labing dako nga hagit nila ni Barandog ug Bayarcal ang pagpahapsay sa dagan sa trapiko sa siyudad samtang wa pay mass transport system ang Cebu City.
Ikaduha mao ang pagpahamtang og disiplina sa mga nagmaneho og sakyanan aron masunod ang mga lagda sa trapiko. Si PMajor Barandog ang nangulo sa mga police checkpoints sa dakbayan sa Sugbo niadtong panahon sa kampanya sa eleksyon.
Gani si outgoing Mayor Tomas Osmeña nireklamo nganong adunay checkpoint nga gibutang duol sa iyang balay sa Guadalupe apan ang CCPO niingon nga apil kini sa ilang police visibility.
Si Barandog ug Osmeña nagkaatubang dihang adunay checkpoint ang CFMC sa Barangay Kasambagan, diin si Konsehal Mary Ann delos Santos napara sa checkpoint.
Si Labella, atol sa press conference kagahapon, Martes, Hunyo 21, nagkanayon nga ang iyang itudlo nga tawo kadtong way mantsa sa pagpangawkaw, adunay prinsipyo ug matinud-anon.
“We have to see to it that we are appointing people who are not only competent but also people who have the reputation of probity and honesty,” padayag ni Labella.
Si Labella niingon nga kon aduna siyay masakpan, bisan labing suod nga alyado, iya kining taktakon.
“In our administration, we have to avoid graft and corruption and that’s one thing that I really cannot tolerate even to the closest of allies if they commit, they really have to go,” dugang sa outgoing vice mayor.