SUPERBALITA CEBU

Bus, mini bus di makahuot sa underpass?

GI-VANDAL: Mao pa gani pagbukas sa underpass, gihugawhugawan na kini og vandal. Angay kining bantayan aron di mahugaw ang mao nga imprastraktura. Karong Biyernes, pasuwayan og paagi sa mga bus ug mini bus ang underpass sa N. Bacalso avenue sa habig sa Mambaling, Dakbayan sa Sugbo isip dry run. (Alan Tangcawan)

MASALIGON ang pangulo sa Cebu Provincial Bus and Mini Bus Operators Transport Cooperative (CPBMTC) nga si Julito Flores nga di makamugna og kahuot sa traffic ang mga bus ug mini buses nga dunay biyahe nga Cebu City paingon sa habagatang Sugbo ug vice versa sa Mambaling area sa pagpahigayon sa dry run.

Dunay dry run alang sa pagpaagi sa mga pampublikong sakyanan sugod alas 9 sa buntag karong Biyernes, Hunyo 28, human sa reklamo sa mga operator nga gidid-an sila sa pag-agi sa bag-o lang nahuman nga Mambaling underpass.

Malaumon si Flores nga di lang kutob sa dry run ang pagpaagi kanila sa dapit.

Kon gikinahanglan, makigtagbo o mosuway pakigkita si Flores ug ang iyang grupo ngadto kang Cebu City Mayor –elect Edgardo Labella aron matuki ang maong hisgutanan.

Una niini, ang Cebu City Transportation Office nidili gihapon sa pagpaagi sa mga bus ug mini-buses sa Mambaling bisan kon nahuman na ang pagtrabaho sa underpass tungod sa dugang kahuot sa traffic nga giingong mamugna nila diha sa dapit.

“Wala na man si Isko (Ouano—CCTO Operations Head), “Tom Jones” (taman June 30), na man siya. So, kon kinsa may mamunu-an sunod sa CCTO unya mo-ingon siya nga dili pasudlon ang atoang bus ug mini bus, ato sa’ng hangyuon si Mayor Labella. Unfair man na namo, gi-detour mi kay magbuhat og tunnel, magbuhat og underpass, unya ang gobiyerno nigasto og P700 million pagsulbad sa traffic situation sa F. Llamas and N.Bacaslo, karon paghuman didto lang diay gihapon mi didto (sa SRP)?,” niingon si Flores.

Alang ni Flores, angay dunay ipahigayon nga konsultasyon, di lang kanila nga mga operator, lakip na mismo sa nagkadaiyang sector, nga apektado sa isyu. Kini sama sa mga trabahante, mga tinun-an ug uban pang mga sumasakay. (AZLG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph