SECTIONS
Sunday, July 21, 2019
SUPERBALITA CEBU

16 ka mga sakop sa PIB di na kabalik

CEBU. Nangita pa si Police Colonel Roderick Mariano nga mahimong hepe sa Provincial Intelligence Branch ug Provincial Drug Enforcement Unit lakip na sa sunod nga personnel niini nga wala'y bahid sa ilegal nga kalihukan. (Hulagway kuha ni Arnold Y. Bustamante)

DI NA mahimong makabalik ang 16 ka mga sakop sa Provincial Intelligence Branch (PIB) nga una nang giparelibohan sa katungdanan ni Police Brigadier Debold Sinas human sa giingong misencounter sa Barangay Sudlon 1, Siyudad sa Sugbo nga niresulta sa kamatayon ni Police Corporal Feliciano Yballe.

Matod sa bag-ong hepe sa kapulisan sa probinsya sa Sugbo, Police Colonel Roderick Mariano, nga mangita na siyag mga bag-ong personnel nga mohulip sa nabakanting unit.

Matod ni Mariano nga kon bag-o ang provincial director, kinahanglan nga bag-o usab ang iyang mga personnel sa intelligence unit nga maoy gitahasan nga manakop sa mga nalambigit sa illegal nga drugas.

“Nag scout lang ako. Mas maganda na bago ako, bago yung PIB ko. Gusto natin na maging katotohanan, gusto ko na magtrabaho ng totoo,” sigun ni Mariano.

Pangitaan niyag paagi kon asa ibutang ang daan na nga mga personnel sa PIB o ka iyang ipang apod-apod sa mga police station sa kalungsuran ug mga siyudad sa probinsya Sugbo.

Dugang ni Mariano nga sa di pa mohimog anti drug operation ang bag-ong personnel, ipaubos una niya kini sa seminar sanglit di basta-basta na lang nga ang usa ka police molusad sa pagpanakop sa drug personalities kon wa siyay kasayoran sa balaod sa illegal nga drugas.

Ipaubos sa background investigation ang bag-ong mga PIB personnel kon wa ba kini malambigit sa illegal nga kalihukan.

Nangita pa usab siya kon kinsay mangulo sa unit nga mahimong kasaligan niya nga way bahid sa kahiwian sa ilang trabaho.

Usa sa mga kanhi sakop sa PIB nga di magpahingan nagkanayon nga iyang dawaton ang desisyon sa bag-ong provincial director.

Kon ilabay sila sa mga police station, uyon sila niini aron makabalik na sila sa ilang trabaho human sa kapin sa usa ka buwan nga walay nahimo.

Tinguha ni Mariano nga malimpyo sa illegal nga drugas ang tibuok probinsya sa Sugbo ilabi na nga nahimo kining sentro sa mga pamahayag ni President Rodrigo Duterte nga daghan ang supply sa illegal nga drugas.

Iya usab nga ipasubay ang mga listahan sa target personalities sa matag lungsod aron mahibaw-an kon aktibo pa ba sa iyang illegal nga kalihukan alang na unya sa posibling pagdeklarar og drug free barangay.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph