MINNEAPOLIS, Minnesota, USA--Nahisama sa bula nga kalit nawala ang paglaum ni Cebuano boxer Jessie Cris “The VIP” Rosales (22-2-1, 10KO) nga makaaway sa US Boxing human naangol ang iyang kontra atol sa ensayo.
Si American fighter Xavier Martinez (14-0, 10KO) mao unta ang kontra ni Rosales karong Biyernes, Hunyo 28, 2019 (Sabado sa buntag RP Time) nga ipahigayon sa Sam’s Town Hotel & Gambling Hall sa Las Vegas, Nevada.
“Sayang kaayo kay gi-cancel man ni Martinez because of an injury but Cris is flying tomorrow going there (California) for training under New Champ Promotions,” mensahe nga gipadala sa Superbalita ni Cheryl Laspiñas Rosales, ang asawa ni Cris.
Samtang magsilbing main event sa promosyon mao ang panagbagat nila ni Cagayan de Oro City-native Mark John “The Journey Man” Yap batok American Angelo “El Chinito” Leo.
Si Yap, 30-anyos, 5’6", orthodox (30-13, 15KO), kanhi Cebu-based fighter, kasamtangang Global Boxing Organization (GBO) Asia Pacific Featherweight champion nga gihuptan ni Shiehawy Adnan Labanto (manager).
Samtang si Leo, 25, 5’6", tuohon (17-0, 8KO), kinsa giila nga "Filipino Assassin," natawo sa Albuquerque, New Mexico apan nagbase na sa Las Vegas, Nevada.
Ang Yap-Leo usa ka 10-round non-title fight nga gikataho nga makita sa Mayweather Promotions Facebook Page.
Nakalabaw sa experience si Yap sanglit taudtaod siya nga nagbase kaniadto sa Cebu City, mibalhin sa Japan sa pipila ka tuig, milarga sa Thailand isip sparring partner ni former WBC Super Flyweight champion Srisaket Sor Rungvisai sa wala pa mibalik sa Cagayan.
“Maninguha gyud ko ani. Okay ra ko sa timbang. Buhaton nako ibabaw sa ring ang tanan nako nakat-unan ilabi na ang sparring namo ni Rungvisai,” matud ni Yap nga nakontak sa Superbalita via online video call.
“Gipahinungod nako ni awaya sa Ginoo, si Nonito Donaire Jr., akong idol ilabi na iyang punch ganahan kaayo ko,” panapos ni Yap ning tigbalita.
Sa pikas bahin, dili sab kumpyansahan si Leo sanglit duha ka pinoy boxers iyang gipangpukan nga sama nila ni Neil John Tabanao (unanimous decision) niadtong Abril 5, 2019 samtang una niyang gi-KO si Glenn Porras niadtong Oktubre 27, 2018. (Daniel Quindao Guden, US Correspondent)