GIHULAGWAY sa usa ka opisyal sa Department of Health (DOH) 7 nga ang pagsige og lingkod mao ang moderno nga pagpanigarilyo.
Si National Nutrition Council (NNC) 7 Regional Nutrition Program Coordinator Dr. Parolita Mission nibutyag nga susama ra og epekto ang pagsige og lingkod sa epekto nga kadaot sa tawo nga manigarilyo.
“Sitting is the new smoking,” si Mission kinsa nagkanayon nga ang pagsige og lingkod nga way aktibidad sa lawas mao ang rason nga daghang sakit ang masinati sa tawo.
Sa matag 10 ka tawo, adunay duha ang taas og risgo sa high blood ug sa taas nga sugar level.
Gibutyag usab ni Mission nga nagkadaghan na ang nagtrabaho nga nagsige lang og lingkod ug way physical activity ug wa nisubay sa healthy diet.
Kini nagpasabot nga kon magsige lang og lingkod, mas taas ang posibilidad nga duol sa sakit.
Nasayran nga 50% sa populasyon aduna’y sedentary lifestyle o lifestyle nga minus lang ang aktibidad o hilig magsigeg lingkod sa couch kay mag-gamit sa gadgets o magtan-aw og salida o TV shows.
Awhag ni Mission sa mga employer nga mopalabang og palisiya nga nagsuporta sa mga kawani niini nga mobarog sa panahon nga mag-meeting o mag-agni sa kawani nga adunay pisikal nga aktibidad samtang nagtrabaho.
Mga eksperto nagduso og mga ehersisyo nga mahimo bisan ang kawani naglingkod.
Girekomendar usab ang pag-ehersisyo og bisan 30 minutos lang matag adlaw.
Gibutyag usab ni Mission nga kining pag-ehersisyo o kining pisikal nga aktibidad, makaayo usab sa mental health sa tawo nga namatud-an na sa daghang mga pagtuon.