ANG pag-salvage sa nalunod nga cargo vessel ug pagsiguro nga dili mokatag pa ang oil spill sa dapit mao ang prayoridad karon sa awrtoridad ug sa kadagkoan sa Solid Earth Development Corporation (SEDC) sa pagtikyaob sa M/V Eva Mary Grace niadtong Martes sa hapon, Hunyo 25, 2019.
Sa pagkakaron gihimo na sa Coast Guard Central Visayas ug sa Maritime Industry Authority (Marina) Central Visayas ang Marine Casualty Investigation diin gilangkuban kini sa team gikan sa station commander sa Coast Guard Cebu, Commander Maritime Safety Service Unit Commander, Marine Environmental Protection Unit Commander ug sa Coast Guard Legal Unit.
Nasayran niadtong Miyerkules sa buntag, Hunyo 26 nakamatikod ang Coast Guard Marine Environmental Protection Unit og inagian sa lana nga posibleng gikan sa maong barko.
Sa gihimo usab nga inspeksyon sa divers sa Coast Guard sa maong barko, wala'y nakita nga kadaot niini ug ilahang gisuwayan ang pag-seal sa port fuel vent apan dili kini nila makita.
Sa Huwebes, Hunyo 27, himuon ang pagkuha sa diesel sa maong barko.
Nasayran nga iya ni David Villono sa EVA Shipping Corporation ang maong barko nga natikyaob.
Matud sa tigpamaba sa Coast Guard Central Visayas Lieutenant Junior Grade Michael Encina nga dili pa sila makasuta sa timeline sa pag-salvage sa maong barko tungod kay ang salvage operator mao ang makasulti niini.
Gibutyag usab ni Encina atol sa iyang pakighinabi sa mga supervisors sa pantalan sa SEDC dihang nibisita siya sa dapit nga wala ra makabalda sa operasyon ang maong insidente.
Puros mga cargo vessel usab ang nakadunggo sa maong pantalan ug mga semento ang kasagaran nga kargamento ang ibiyahe gikan sa maong pantalan.
Di pa usab matubag sa Coast Guard ang danyos sa maong kadaot apan gibutyag ni Encina nga ang kantidad sa cargo vessel, mao usab ang kantidad sa kadaot sa maong pagtikyaob.
Ang wala pagbalanse sa maong barko dihang nagkarga og semento mao ang rason nga natikyaob kini niadtong Martes, Hunyo 25 sa pantalan sa SEDC sa South Poblacion, lungsod sa San Fernando. (HBL)