DAKONG hagit sa bugtong eight-division world champion Manny Pacquiao ang pagpakigsangka sa wala pay pildi nga si Keith Thurman karong Hulyo 20 (Hulyo 21 dinhi sa Pilipinas) didto sa MGM Grand Arena sa Las Vegas, Nevada.
Ning pipila na lang sa semana sa dili pa ang binukbokay, naobserbahan nga nagkainit ang binayloay og mahait nga pulong tali sa duha ka kampo.
Kon sa niaging adlaw, gipabuhagay ni Thurman nga andam siyang mopusta og $10,000 nga iyang ma-knockout sulod lang sa duha round si Pacquiao, ang fighting senador mibaliwala lang niini.
Gani gipasumbingay ni Pacquiao nga kining maong away nakapahinumdom kaniya sa ilang panagsangka ni Miguel Cotto kinsa iyang gi-knockout sa ika-12 nga round niadtong 2009.
“Keith Thurman reminds me of the Cotto fight,” matod ni Pacquiao (61-7-2, 39 KOs), sa dihang gi-interview sa mga tigbalita didto sa Estados Unidos.
“I have to work hard making strategy and focus on speed,” tug-an ni Pacquiao BoxingScene.com. “I feel motivated because of what he said. We’ll see how the fight ends. I think it’s going to be exciting but we’ll see what happens in the ring.”
Dili ikalimod ang mga legasiya nga nahimo ni Pacquiao lakip na niini ang iyang pagkakampiyon sa walo ka division ug nahimo na usab nga “fighter of the decade.”
Gawas sa mga kadaugan nga nakapalakip kaniya sa mga hall-of-famers, kabahin na usab siya sa kasaysayan sa boxing nga usa sa pinakadakog kita sa dihang iyang gikasangka si Floyd Mayweather.
Wa na gyud unta siyay ikapamatuod pa sa iyang abilidad apan bisan pa niini daghan ang nasurprisa kon nganong sa edad nga 40-anyos, iya pa mang gisugal ang iyang kaugalingon batok ni WBA “Super” champion Keith Thurman, ang giilang top 3 sa welterweight ug kanhi pound-for-pound champion.
Sa iyang uwahing away, iya man tuod nga napildi sila si Adrien Broner ug Lucas Matthysse, apan matataw nga ang Pacquiao kaniadto dili na mao ang Pacquiao karon.
Si Thurman (29-0, 22 KO’s), lahi kon itandi ni Broner ug Matthysse ug anaa pa kini karon sa saktong kapiskay sa panglawas.
“That’s the evidence of being passionate for the sport, boxing is my passion and I love it,” dugang ni Pacquiao. “It’s different. I have to work hard and have discipline. This the most important thing.” (JBM)