MIPAULBO og 82 puntos, pipila niini gikan sa three-point area, si Ronald Adlawan sa dihang gidominar sa Tungkil (Blue team) ang Violet, 127-70, sa best-of-four series sa naghinapos nga 2019 Minglanilla Mayor’s Cup Summer League 40-up nga gipahigayon niadtong Martes sa gabii sa Minglanilla Sports Complex.
Gikan pa lang sa sinugdanan, gipakita na sa Tungkil ang kahanas aron irehistro ang ilang unang daog sulod sa duha ka duwa.
Ang 82 puntos nga napuga ni Adlawan sulod sa usa ka duwa, maoy pinakadako sa kasaysaysan sa lega.
Kadto maoy ikaduhang kapildihan sa Violet nga gipangulohan sa mga kanhi varsity player sa USJ-R nga sila si Ancing Campanion, Kit Castro ug kanhi sakop sa Cebu Central Colleges (CCC) Executives nga si Monching Cadiz.
Pero ang laing mikawat og atensiyon sa kagabhion mao ang muna sa ginhawa nga kadaugan sa defending champion Linao-Lipata batok sa Tulay I, 89-84, sa 21-under division.
Naglabaw ang Tulay, 92-89, sa nahabiling dos minutos kapin sa duwa, mipabuto si Edrianne Laspuna og tres nga nagtabla, 82-82, sa katapusang 1:52 sa duwa.
Nainat sa Linao ang labaw sa dihang nakamugna og three-point play si USJ-R Jaguar mainstay John Mangaron ug laing fastbreaking play ni Gigi Gilbuena nga maoy naghatag og kasiguroan sa ilang kadaugan.
Sa kadaugan, pabiling limpiyo ang baraha sa Linao, 3-0, samtang ang kapildihan naghatag og 1-2 nga baraha sa Tulay.
Si Mangaron mitali og 17 puntos, 13 ang nadugang ni Gilbuena ug 10 usab kang John Cabradilla.
Sa Tulay, nangulo si Tristan Cabrera nga may 24 puntos ug 22 ang natampo ni Maveil Caneda.
Sa 17-under, gipildi sa Tungkil ang Ward 4, 85-76. Hinuon, ang duha pulos nagtangag og 1-2 nga baraha, butang nga naghatag og kalisdanan sa ilang tinguha nga makalabni og lingkuranan alang sa finals.
Nangulo sa kadaugan sa Tungkil si Joshua Gonzales nga may 18 puntos, nga gisundan kini sa 17 ni Shane Drick Jagna. (JBM)