SA TINGUHA nga kahatagan og kasulbaran ang kontrobersiya, mga opisyal sa Philippine Olympic Committee (POC) ang nagkauyon nga boluntaryong moluwat sa ilang tagsatagsa ka mga katungdanan.
Kini aron hugpongan ang pagpahigayon og special elections aron pagkuha og presko nga mandato gikan sa mga sakop niini human sa kalit nga pag-resign ni Ricky Vargas pagka presidente sa maong grupo.
Ang kasabutan nakab-ot atol sa informal meeting sa POC didto sa GSIS gym diin ang vice-president nga si Joey Romasanta, ug ang chairman nga si Bambol Tolention, ug board member Clint Aranas nakakomiter nga mang-resign aron kahatagan og dalan ang pagpahigayon og piniliay nga gikatakda karong Hulyo 5.
Gisaysay ni Tolentino nga atol sa debati ug diskusyon, usa sa mga sakop ang misugyot nga bakantihan ang tanang posisyon ug ipahigayon ang election, butang nga ila ra usab nga nauyonan gilayon.
Matod ni Tolention nga mao usab kini ang buhaton nila ni Julian Camacho, treasurer, Jonne Go, auditor ug board member Cynthia Carrion.
Wala man tuod sila ang second VP nga si Jeff Tamayo ug ang duha ka board members nga sila si Robert Mananquil ug Butch Pichay apan nagtuo si Tolentino anaa ra kini kanila kon mo-resign ba usab sila.
Gipasabot ni Romasanta nga wala siyay intensiyon nga magpapili isip presidente sa POC sanglit dugay na usab niyang gihandom nga adunay mga bag-o ug batan-on nga mga personalidad nga modala sa POC.
Usa usab sa gikabalak-an ni Romasanta mao nga tingalig mahibaw-an sa International Olympic Committee (IOC) nga adunay kagubot nga mitumaw sa POC kon magsigi pa sila og lantugi. (JBM)